काठमाडौं- प्रमुख प्रतिपक्षी नेपाली कांग्रेसले उपसभापति धनराज गुरुङ र महामन्त्री गगन थापाको नामै उल्लेख गरेर छानबिन समिति बनाउँदा कुनै आपत्ति नहुने जनाएको छ ।

सहकारी ठगी प्रकरणमा मुछिएका उपप्रधान तथा गृहमन्त्री रवि लामिछानेको बचाउमा सत्तापक्ष उत्रिइरहँदा कांग्रेसले यस्तो उल्लेख गरेको हो ।

प्रतिनिधि सभा बैठकमा मंगलबार कांग्रेस सह-महामन्त्री बद्री पाण्डेले गृहमन्त्री लामिछानेले आइतबारको बैठकमा उपसभापति गुरुङ र महामन्त्री थापामाथि गम्भीर लाञ्छना लगाएको भन्दै नामै किटेर छानबिन समिति बनाउन सरकारलाई चुनौती दिएका हुन् ।

‘हाम्रो पार्टीका उपसभापति र महामन्त्रीमाथि जसरी उहाँले लाल्छना लगाउनुभएको छ, म सरकार र गृहमन्त्रीलाई चुनौती दिन चाहन्छु। के कस्तो खालको टीओआर बनाउनु पर्ने हो बनाउनुस्,’ उनले भने, ‘हाम्रा उपसभापति र महामन्त्रीको नामै किटेर टीओआरमा लेख्नुपर्ने हो कि व्यक्तिको लेख्नु पर्ने हो कि कांग्रेसको लेख्नु पर्ने हो, लेख्नुस्। छानबिनको समय पनि तोक्नुस् ।’

पाण्डे छानबिनमा उपसभापति गुरुङ र महामन्त्री थापा दोषी देखिए सरकारले कांग्रेसका जुनसुकै नेतामाथि पनि कारबाही गर्न सक्नेसमेत बताए ।

‘छानबिनको निष्कर्ष, निचोडमा हाम्रो उपसभापति र महामन्त्री दोषी हुनुभयो भने उपसभापति र महामन्त्री त के कांग्रेसका को कोलाई कारबाही गर्नुहुन्छ, गर्नुस्,’ पाण्डेले भने, ‘यो मेरोमात्रै नभएर कांग्रेसको संस्थागत निर्णय हो । हिजो बसेको संसदीय दलकोे निर्णय हो ।’