काठमाडौं– फिल्म ‘पुजार सार्की’का नायक पल शाहले वृद्ध ‘लुक्स’को दुई तस्बिर सार्वजनिक गरेका छन् । उनले मंगलबार सार्वजनिक गरेका ती तस्बिर फिल्ममा उनले निर्वाह गरेको चरित्रको हो ।

यसअघि पलको फिल्ममा निर्वाह गरेको पात्र ‘मेघराज’को चरित्र चित्रण हुने तस्बिर सार्वजनिक भएको थियो । जसमा उनी युवा ‘लुक्स’मा देखिएका थिए ।

पछिल्ला दुई तस्बिरले फिल्ममा उनको भूमिकाबारे संशय पैदा गरेको छ । ती तस्बिरमा वृद्ध ‘लुक्स’मा देखिएका पल प्रहरी मुठभेटमा देखिएका छन् । धेरैले उनको यो लुक्स मेघराजको वृद्ध भएपछिको हुन सक्ने अनुमान गरेका छन् ।

तस्बिर सार्वजनिक गर्दै पलले कार्यव्यस्थताले फिल्म प्रचारमा सहभागी हुन नपाएको जानकारी समेत दिएका छन् ।

उनले लेखेका छन्, ‘मेरो भूमिका र प्रचारको सहभागिताका विषयमा मेरा शुभेच्छुकहरूले देखाउनु भएको चासो र चिन्ताप्रति नतमस्तक छु। थुप्रै सञ्चारमाध्यमहरूमा पनि मेरो खोजी भइरहेको खबर पाइरहेको छु। चाहेर पनि मैले प्रत्यक्ष रूपमा म यहाँहरूको अगाडि उपस्थित हुन सकेको छैन। मेरो यो बाध्यतालाई यहाँहरूले बुझिदिनुहुनेछ भन्ने अपेक्षा लिएको छु।’

यो फिल्म प्रदर्शनमा आउन दुई दिन मात्रै बाँकी छ । यो फिल्मले सिनेमा घरमा अनमोलको फिल्म फर्कीफर्कीसँग प्रतिस्पर्धा गर्दै छ ।