काठमाडौं- नेकपा एकीकृत समाजवादीकी सचिव रामकुमारी झाँक्री पछिल्लो समय राष्ट्रिय स्वतन्त्र पार्टीका सभापति रवि लामिछानेसँग आमनेसामने भएका नेपाली कांग्रेसका महामन्त्री गगनकुमार थापाको बचाउमा उत्रिएकी छन् ।

२०६२/६३ ताका भएको दोस्रो जनआन्दोलनका बेला तत्कालीन शाही शासकविरुद्ध एकै मोर्चामा उत्रिएका गगनलाई रामकुमारीले युवाहरूको राजनीतिक आइकन भनेकी हुन् ।

आइतबार मात्रै उपप्रधान तथा गृहमन्त्रीसमेत रहेका रवि लामिछानेले गगनमाथि दर्जनभन्दा बढी आरोप लगाएको अवस्थामा रामकुमारीले हेक्का राख्न चेतावनी दिएकी हुन् ।

‘गगन थापा यो आन्दोलनको नेता हो। युवाहरूको राजनीतिक आइकन हो । आफ्नो सामर्थ्यले यो तहको नेता बनेको हो’, रामकुमारीले भनेकी छन्, ‘गगन थापामाथि लगाएको आरोपको प्रमाणको भार स्वयम् आरोप लगाउनेले पूरा गर्नुपर्छ, हेक्का रहोस ।’

स्मरणीय के छ भने यी दुवै नेता एक-एक पटक मन्त्रीसमेत भइसकेका छन् । यता रवि भने दोस्रो पटक गृहमन्त्रीको भूमिकामा छन् ।

रवि र गगनबीच संसद्‍देखि सामाजिक सञ्जाल र सडकमासमेत टकराव देखिएका बेला रामकुमारीले गगनलाई साथ दिँदै उनको बचाउ गरेकी हुन् ।