काठमाडौं- जनता समाजवादी पार्टी नेपालका अध्यक्ष उपेन्द्र यादवले आइतबार सर्वोच्च अदालतमा दर्ता गरेको रिट हेर्न नभ्याइनेमा परेको छ ।

सर्वोच्च अदालतका न्यायाधीश प्रकाशकुमार ढुंगानाको इजलासमा पेसी सूचीको अन्तिममा रहेको यो रिटमा सुनुवाइ नभइ हेर्न नभ्याइनेमा परेको हो ।

यादवले गत वैशाख २३ गते पार्टी फुटाएर नयाँ जसपा बनाएका अशोक राईसहित ७ सांसदलाई संसदीय गतिविधिमा सहभागी हुनबाट रोक लगाउन मागसहित आइतबार रिट दायर गरेका थिए ।

यादवले उनीहरूलाई सोमबार संसदमा प्रधानमन्त्री पुष्पकमल दाहाल प्रचण्डले लिने विश्वासको मतमा पनि सहभागी हुन नपाउने गरी रोक लगाउने आदेश माग गरेका थिए ।

तर प्रधानमन्त्री प्रचण्डले प्रमुख प्रतिपक्षी नेपाली कांग्रेसको विरोधबीच प्रतिनिधिसभाबाट तेस्रो कार्यकालको चौथो पटक विश्वासको मत लिएका छन् । प्रचण्डको पक्षमा १५७ सांसद उभिएका छन् ।

जसमध्ये अशोक राई नेतृत्वको जसपाका ७ सांसदले पनि प्रधानमन्त्रीलाई विश्वासको मत दिए ।

यादवले नै यसअघि दल विभाजनविरुद्ध दिएको रिटमाथि मंगलबार पेसी तोकिएको छ । तर यसअघि अल्पकालीन अन्तरिम आदेश जारी भएको उक्त मुद्दामा सुनुवाइ हुने नहुने टुंगो छैन ।