काठमाडौं– राष्ट्रिय स्वतन्त्र पार्टी रास्वपाले छानबिन समितिका नाममा ४ सहकारीलाई मात्र फोकस गरेको आरोप लगाएको छ । 

रास्वपाका संसद् मनिस झाले कांग्रेसले समग्र सहकारीका विषयलाई ओझेल पारेर खाली ४ वटा सहकारीमा मात्र फोकस भएको बताए । 

उनले भने, ‘हामी समग्र सहकारीको छानबिन गरौँ भन्छौँ । उहाँहरू कहिले सहमत हुनुहुन्न । कहिले बिचमा कुरा फेर्नुहुन्छ । घण्टा–घण्टामा उहाँहरूको बेली फेरिन्छ । उहाँहरूलाई सत्ता चाहिएको हो । हामीलाई बोल्न दिनु अनि समिति बनाउँला भन्दा उहाँहरू विश्वास गर्नुहुन्न । यसरी त कसरी होला र ? कांग्रेसले सरकार मागेको छ । सहकारीको विषय बाहान मात्रै हो ।’ 

उनले कांग्रेसका नेताहरूको भनाइ नै बाझिने बताएका छन् । कांग्रेसले  ड्राफ्ट मागेको तर कस्तो  ड्राफ्ट भन्दा जवाफ नभएको बताए । 

उनले भने, ‘कांग्रेस व्यक्तिमाथि खनिएको छ । सरकार बिना छटपटिएको छ ।’ 

उनले विभिन्न विकल्पहरू भएकाले कांग्रेसले अडान छाडेर रास्वपालई बोल्न दिनुपर्ने बताए । उनले भने, ‘समग्र सहकारीको छानबिन हुनुपर्छ ।’

यसै विषयमा दलका शीर्ष नेता, प्रधानमन्त्री र सभामुख अहिले छलफलमा भएको सभामुखको सचिवालयको भनाइ छ ।