काठमाडौं- नेकपा एकीकृत समाजवादी पार्टीका अध्यक्ष माधवकुमार नेपालले फुटको हल्लाले आफू आत्तिएको बताएका छन् ।

जनता समाजवादी पार्टी विभाजन भएसँगै आफू नेतृत्वको दल पनि विभाजन हुने हल्लाका कारण आफू निक्कै आत्तिएको अध्यक्ष नेपालले मंगलबार बताए ।

पार्टीको केन्द्रीय कमिटीको आठौँ बैठकलाई ललितपुरको बालकुमारीमा मंगलबार सम्बोधनका क्रममा उनले विभाजन रोक्न मिहिनेत गर्नुपरेको बताए ।

‘हाम्रो पार्टीका सन्दर्भमा हल्ला पनि चले, ६ जना सांसद लाँदैछन् भन्ने हल्ला मैले पनि सुनेँ। त्यसले गर्दा हामी पनि आत्तियौँ, के हो वास्तविकता भनेर छलफल चलायौँ’, उनले भने, ‘तर जति गणना गर्दा पनि कोही जाने देखिँदैन । कतिपय साथीहरूका असन्तुष्टिलाई पनि राम्रो ढंगले प्रष्ट पार्न खोजियो । चित्त बुझाउने कोसिस हुनुपर्छ । हामीले त्यही गर्‍यौँ ।’

उनले पद र शक्तिका लागि समाजवादीभित्र पनि भ्रष्टीकरण रहेको बताए । ‘हाम्रो पार्टी, कम्युनिस्ट आन्दोलन र नेपाली राजनीतिमा भ्रष्टीकरण छ । पदका लागि मरिहत्ते गर्ने, लोभ देखाउने समस्या छ’, उनले भने, ‘पुरानै प्रवृत्ति दोहोर्‍याउन थाले, अनुशासनहीनता र अराजकता देखाउन थाले, विचलन देखाउन थालेमा हामीलाई कसैले विश्वास गर्दैन ।’

उनले एकीकृत समाजवादी राजनीतिक भ्रष्टीकरणविरुद्ध अभियान चलाउनुपर्ने बताए । गठबन्धनको सरकार भए पनि अस्थिरताको उच्च जोखिम रहेको पनि उनले बताए।

‘अहिले नै आजै के होला भन्ने भएको छ । सुदूरपश्चिममा के होला, बागमतीमा के होला, मधेसमा के होला भन्ने भएको छ । राष्ट्रपतिलाई सम्बोधन गर्न दिन पनि मुस्किल भएको छ’, उनले भने, ‘अझ हाम्रो पार्टीलाई सरकारका ठूला छलफलमा सहभागी गराइएको छैन । हाम्रो पार्टीलाई बेवास्ता गरिएको छ । संसद्‍को अवरोध हटाउने सन्दर्भमा सोधिँदैन । यी पीडा र वेदना हामी सँग छन् । हामीलाई बजेट निर्माणबारे पनि सोधेनन् ।’