काठमाडौं- संसद्मा गतिरोध कायम रहेका बेला प्रधानमन्त्री पुष्पकमल दाहाल प्रचण्डले राष्ट्रपति रामचन्द्र पौडेलसँग संवाद गरेका छन् ।

आइतबार दिउँसो राष्ट्रपति भवन शीतल निवासमा राष्ट्रपति पौडेल र प्रधानमन्त्री दाहालबीच भेटवार्ता भएको हो ।

भेटमा मुलुकको समसामयिक विषयमा छलफल भएको राष्ट्रपतिको स्वकीय सचिवालयले जानकारी दिएको छ ।

खासगरी उपप्रधान तथा गृहमन्त्री रवि लामिछानेलाई लिएर संसद्मा प्रमुख प्रतिपक्षी नेपाली कांग्रेस आन्दोलित छ । त्यहीकारण संसद्का दुवै सदन अघि बढ्न सकेका छैनन् ।

उता सरकारले यही जेठ १ गते आगामी आर्थिक वर्षको नीति तथा कार्यक्रम पनि ल्याउँदैछ ।

कांग्रेसको अवरोधका कारण नीति तथा कार्यक्रम संसद्‍का दुवै सदनमा वाचन गर्न पनि राष्ट्रपतिलाई अप्ठेरो पर्ने अवस्था छ ।

यद्यपि कांग्रेसले राष्ट्रपति संसद्‍मा आउँदा कुनै अवरोध नगर्ने जनाएको छ । आइतबार मात्रै प्रधानमन्त्री दाहालले नेपाली कांग्रेसका सभापति शेरबहादुर देउवा र प्रमुख सचेतक रमेश लेखकसहितसँग संवाद गरेका थिए ।

उक्त संवादमा सहकारी ठगी प्रकरणमा छानबिन समिति बनाउन सरकार सकारात्मक रहेको कांग्रेस सचेतक लेखकले बताएका थिए ।

तर संसदीय छानबिन समिति उपप्रधानमन्त्री लामिछानेकेन्द्रित बनाउने कि सबै घटनाबारे अध्ययन गर्ने विषयमा कुरा मिल्न सकेको छैन ।