काठमाडौं– काठमाडौँ महानगरपालिका–९ बत्तिसपुतलीस्थित कुमारी टोलमा गए राति एकजना युवकको हत्या गरेको अभियोगमा पक्राउ परेका चारैजना १६ वर्षमुनिका रहेको खुलेको छ ।

गएराति दुई समूहबीच भएको झगडामा मोरङका २४ वर्षीय युवक शम्भु धिमालको हत्या भएको थियो ।

उक्त घटनामा संलग्न रहेको अभियोगमा पक्राउ परेका चारैजना नाबालिग रहेको अनुसन्धानबाट खुलेको जिल्ला प्रहरी परिसर काठमाडौँका प्रवक्ता एवम् प्रहरी उपरीक्षक नवराज अधिकारीले बताए ।

‘गएराति दुई समूहबीच झगडा हुँदा एक युवकको मृत्यु भएको छ, घटनामा संलग्न चारजनालाई नियन्त्रणमा लिएर आवश्यक अनुसन्धान गर्दा उनीहरू सबै नाबालिग रहेको खुल्न आएको छ’ , उनले भने, ‘उनीहरू सबै १६ वर्षमुनिका भएकाले नाम सार्वजनिक गरिएको छैन, घटनाको अहिले पनि अनुसन्धान जारी छ ।’

दुई समूहबीच झगडा हुँदा धिमालमाथि एकजना किशोरले चक्कु हानेका थिए । उनलाई घटनालगत्तै सिनामङ्गलस्थित काठमाडौँ मेडिकल कलेजमा उपचारका लागि लगिएको थियो ।

तर त्यहाँ चिकित्सकले तत्कालै उनलाई मृत घोषित गरे । अधिकारीका अनुसार बाटोमा हिँड्दै गर्दा धिमाल र पक्राउ परेका किशोर एक अर्कासँग ठोक्किएका थिए। त्यही कुरालाई लिएर दुई पक्षबीच झगडा सुरु भएर ज्यानसम्म गएको हो ।

उक्त झगडाका क्रममा मृतक धिमालका साथी २३ वर्षीय मनिष चौधरी पनि घाइते भएका छन् । ज्यान गुमाएका शम्भु धिमालको शव पोस्टमार्टमका लागि त्रिभुवन विश्वविद्यालय शिक्षण अस्पताल महाराजगञ्जमा राखिएको प्रवक्ता अधिकारीले बताए ।

झगडामा संलग्न दुवै पक्ष एकअर्कासँग अपरिचित थिए । आक्रमणमा संलग्नमध्ये तीनजना किशोहरू गयराति जन्मदिनको पार्टी खाएर फर्किने क्रममा हिँडिरहेका थिए । जन्मदिनको पार्टी खाएर फर्किरहेका उनीहरूले बाटैमा छ्याङ पिएको पनि खुलेको छ । छ्याङ खाने क्रममै तीनजनाको समूहमा १४ वर्षीय किशोर पनि थपिए ।

जन्मदिनको पार्टी र बाटोमा छ्याङसमेत पिएका चारजनाको समूह हिँड्ने क्रममा धिमाल र चौधरीसँग ठोक्किए । ठोक्किएपछि त्यहीँ भनाभन सुरु भयो । भनाभनले उग्र रुप लिँदा ४ मध्ये एकजनाले धिमाल र चौधरीमाथि छुरा प्रहार गरे ।