काठमाडौं– स्पेनिस ला लिगा फुटबलमा डिपोर्टिभो अलाभेस र गिरोनाले बराबरी खेलेका छन् । गएराति भएको खेलमा दुवै टोलीले २–२ गोलको बराबरी खेल्दै अंक बाँडेका छन् ।

अलाभेसका लागि जोन गुरिडीले दुई तथा गिरोनाका एरिक गार्सिया र याङ्गेल हेरेराले एक–एक गोल गरेका थिए ।

खेलको चौथो मिनेटमा गिरोनाका गार्सियाले टोलीलाई सुरुवाती अग्रता दिलाएका थिए । तर अलाभेसका गुरिडीले १२औँ मिनेटमा गोल फर्काउँदै खेललाई १–१ को बराबरीमा ल्याए ।

त्यसपछि ४४औँ मिनेटमा गोल गर्दै हेरेराले गिरोनालाई २–१ गोलको अग्रता दिलाए । तर दोस्रो हाफको इन्जुरी समयको नवौँ मिनेटमा अलाभेसका गुरिडीले व्यक्तिगत दोस्रो गोल गर्दै टोलीलाई हारबाट जोगाउँदै २–२ गोलको बराबरी गरे ।

यो बराबरीसँगै गिरोना ३५ खेलबाट ७५ अंकसहित दोस्रो स्थानमा यथावत छ भने अलाभेस ४२ अंकका साथ ११औँ स्थानमा छ ।

पहिलो स्थानमा रहेको रियल मड्रिड ३४ खेलबाट ८७ अंकसहित शीर्षस्थानमा छ ।