काठमाडौं– राष्ट्रिय सभामा नेपाली कांग्रेस संसदीय दलका नेता कृष्णप्रसाद सिटौलाले गृहमन्त्री रवि लामिछानेमाथि संसदीय छानबिन समिति गठन नभएसम्म दुवै सदनको बैठक चल्न नदिने बताएका छन् ।

सहकारी ठगी प्रकरणमा जोडिएपछि उपप्रधान एवम् गृहमन्त्री लामिछानेमाथि छानबिन गर्न संसदीय छानबिन समिति बन्नुपर्ने कांग्रेसको माग यथावत रहेको उनले बताए ।

सिटौलाले शुक्रबार बसेको राष्ट्रियसभाको बैठकमा बोल्दै निर्दोष हो भने छानबिन समितिले यतिकै दोषी बनाउने होइन भन्दै प्रश्न पनि गरे ।

नेता सिटौलाले गृहमन्त्रीमाथि लागेको ठगी आरोप माफीयोग्य नभएको बताए । उनले गृहमन्त्रीका विषयमा प्रहरीले निष्पक्ष भएर छानबिन गर्नै नसक्ने भन्दै समिति आवश्यक भएको दाबी गरे ।

‘हामीले पटक-पटक कहिले प्रधानमन्त्री त कहिले सभामुखको समन्वयमा उहाँलाई भेटेका छौँ । गृहमन्त्रीसँग पनि कुरा राखेका छौँ । तपाईंले संसदीय छानिबन समिति बनाएर क्लिन चिट लिनुस् भनेका हौँ’, उनले भने, ‘ हामी सहयोग गर्न चाहन्छौँ । अर्बौँ घोटालाको कुरा छ । अर्बौँ अपचलनको कुरा छ । गृहमन्त्रीमाथि लागेको यति ठूलो आरोपमा छानबिन नगरी क्लिन चिट दिन कसरी मिल्छ ?’

सिटौलाले गृहमन्त्रीको राजीनामा पनि नमागिएको बताए । ‘अहिले त हामीले राजीनामा पनि मागेका छैनौँ । संसदीय छानबिन समिति बनाऊँ, सत्तापक्ष तपाईंहरू नै हुनहुन्छ भनेका हौँ’, उनले  भने,  ‘छानबिन समिति बनाउनु हुँदैन भन्नेमा सबैभन्दा अगाडि गृहमन्त्री नै देख्दछु । किन बनाउनु नहुने? निर्दोष हो भने छानबिन समितिले यतिकै दोषी बनाउने त होइन ।’