धनगढी- सुदूरपश्चिम प्रदेशका मुख्यमन्त्री दीर्घबहादुर सोडारीले विश्वासको मत लिन बोलाएको प्रदेश सभाको बैठक स्थगित गरिएको छ।

मुख्यमन्त्री सोडारीलाई विश्वासको मतको प्रयोजनका लागि शुक्रबार बोलाइएको बैठक अर्को सत्तारुढ नेकपा एमालेको अडानका कारण स्थगित गरिएको हो।

सोडारीले विश्वासको मत लिन भनेर संसद् बैठक अब शनिबार साँझ साढे ५ बजेसम्मलाई स्थगित गरिएको हो ।

प्रदेश संसद सचिवालयले शुक्रबार अपरान्ह एक सूचना निकालेर शनिबार साँझ ५ बजेसम्मलाई बैठक स्थगित गरिएको जनाएको छ ।

एमाले संसदीय दलका नेता राजेन्द्र रावलले आफूहरूसँग सोडारीले सल्लाह नगरेको भन्दै शुक्रबार विश्वासको मत दिन नसकिने बताएका थिए ।

एमालेले सोडारी सत्तारुढ दलहरूसँग सल्लाह नै नगरी अघि बढ्न खोजेको भन्दै आपत्ति जनाएको छ । एमालेले सोडारीलाई समर्थन गरे पनि अझैसम्म मन्त्रीहरू पठाउने निर्णय गरेको छैन ।

उता नेपाली कांग्रेसले पनि उन्मुक्तिका लक्ष्मणकिशोर चौधरीलाई मुख्यमन्त्री नियुक्त नगरेर संविधान मिचेको भन्दै संसद् अवरुद्ध पार्ने चेतावनी दिँदै आएको थियो ।

उता नाउपाले सोडारीलाई विश्वासको मतको विपक्षमा मतदान गर्न ह्विप नै जारी गरेको थियो ।