काठमाडौं– नेकपा (एमाले) का अध्यक्ष केपी शर्मा ओलीले काठमाडौं महानगरपालिका प्रमुख बालेन्द्र साहले सुकुम्बासी र गरिबलाई देखिनसहेको बताएका छन् ।

बिहीबार पार्टीनिकट भूमि अधिकार तथा श्रमिक संगठन नेपालको कार्यक्रलाई सम्बोधनका क्रममा ओलीले सुकुम्बासीमाथि ज्यादति नगर्न चेतावनी नै दिए ।

सुकुम्बासीका छाप्रा भत्काउन डोजर नचाहिने उनले बताए। गरिबको बस्ती भत्काउन गरिबकै छोराछोरीको प्रयोग नगर्न पनि उनले आग्रह गरे ।

‘सुकुम्बासीका प्लास्टिकका हालेका छाप्रा छन्, भत्काउन डोजर जान्छ । प्लास्टिकका छाप्रा भत्काउन डोजर जानुपर्छ? कर्कलो फाँड्न बन्चरो बोक्ने? सुकुम्बासी समस्या समाधान गर्नुपर्छ, डोजर देखाउने होइन’, उनले भने, ‘डोजर गरिबले नै चलाउने हुन्, धनीले पुँजीपतिले चलाएको थाहा छैन । गरिबका छोराले डोजर चलाउँछन् । तिनलाई आफ्नैविरुद्ध डोजर चलाउन नलगाउनुस् । गरिवकैविरुद्ध, गरिव बस्तीकैविरुद्ध, गरिबका छोराछोरीलाई डोजरका टाउकामा बसेर भत्काउने काम नलगाउनुस्।’

अध्यक्ष ओलीले भत्काउने अभियान नभएर बनाउने अभियान चलाउन आग्रह गरे । सुकुमबासी समस्या समाधान गर्नुपर्ने उनको भनाइ छ । जनताको काम गर्न सरकारका गएको दाबी गर्दै उनले सुकुम्बासीको समस्या समाधानका लागि प्रयास गरिरहेको बताए ।

उनले सुकुम्बासीमाथि ज्यादती नगर्न पनि चेतावनी दिए । सुकुम्बासीको छाप्रोमा गएर लालाबाला तर्साउँदैमा बहादुर नहुने उनले बताए ।

‘सुकुम्बासीमाथि ज्यादती नगरौँ । कहीँ हेप्ने मान्छे भेटिएन अनि गरिब हेप्ने ? थर्काउने, तर्साउने कहीँ नभेटिए सुकुम्बासीका लालाबाला तर्साएर कुन बहादुरी हुन्छ ?’ उनले सोधे ।

सुकुम्बासी समस्या समाधानका लागि तीनै तहका सरकार उत्तरदायी हुनुपर्ने उनले बताए ।

अध्यक्ष ओलीले लोकतन्त्रमा जे पनि गर्न नमिल्ने बताउँदै सुकुम्बासीलाई लखेट्ने नभएर व्यवस्था गर्नुपर्ने उल्लेख गरे ।

‘जहाँसुकै जाऊ, जेसुकै गर, खाए खाऊ, नखाए मर’ जस्तो अनुत्तरदायी र गरिब देख्नै नसक्ने सरकारको काम छैन’, उनले भने।

‘सुकुम्बासी बस्ती हटाएर मात्रै समाधान हुँदैन । लोकतन्त्रमा, व्यवस्थापन गर्नुपर्छ, ’ उनले भने, ‘समस्या समाधान गर्नुपर्छ । जहाँसुकै जाऊ, जेसुकै गर, खाए खाऊ, नखाए मर भन्ने सरकार हुँदैन । त्यो केन्द्रीय सरकार, प्रदेश सरकार र स्थानीय सरकार जुन होस् । जनताप्रति उत्तरदायित्व नहुने, गरिब देख्नै नसक्ने, सुकुमबासी देख्नै नहुने गलत हो ।’