काठमाडौं– विश्व मजदुर दिवसको अवसरमा मैथली भाषाको फिचर फिल्म ‘लेवर’ निर्माणको औपचारिक घोषणा भएको छ । निर्माण घोषणा गर्न बुधबार सुन्धारामा आयोजना गरिएको एक कार्यक्रममा निर्माण पक्षले टिजर समेत सार्वजनिक गरेको हो । 

टिजरमा उत्पल झा, राम भजन कामत, राजेश सक्सेना, राकेश यादव, जयनाथ अधिकारीलगायतका कलाकारलाई देखाइएको छ । अन्य कलाकार चयन बाँकी रहेको निर्माण पक्षले जनाएको छ । 

रोजगारका लागि विदेशिन बाध्य नेपाली नेपालीको कथामा आधारित फिल्म निर्देशक पूर्णेन्दु के झा र नरेश मिश्राले लेखका हुन् । निर्देशक झाका अनुसार यो फिल्मले लेबर र सरकार बीचको कथालाई सशक्तरूपमा पेस गर्न आफ्नो प्रयास रहने बताए । 

झाले भने, ‘हाम्रो देशबाट लेबरको काममा बिदेसिनेको सङ्ख्या बढी छ । उनीहरूको आ-आफ्नै कथा छ । ती कथालाई पर्दामार्फत धेरै व्यक्तिसम्म पुर्याउनु पर्छ भन्ने लागेर हामीले फिल्म निर्माण गर्दैछौँ।’

यस फिल्म भोजपुरी र नेपाली भाषामा समेत प्रदर्शनमा ल्याउने झाले बताए छन् । 

पुर्णेन्दु प्रोडक्सन्स प्रालि र अरिपन फिल्म्स प्राइभेट लिमिटेडको संयुक्त ब्यानरमा बन्ने यस फिल्मको निर्माता झा स्वयं हुन् भने सतेन्द्र झा, संजय साह, शेरू खान, शिखा ठाकुर, नारन अधिकारी, रमेश रञ्जन, धिरेन्द्र प्रेमर्षी र लक्ष्मी ठाकुर सह–निर्माता हुन् । 

फिल्म २०२४ को अन्तिम महिनामा प्रदर्शन गर्ने योजना रहेको निर्माण पक्षले जनाएको छ । 

सो कार्यक्रममा पूर्व राजदूत सूर्यनारायण मिश्र, राष्ट्रिय समाचार समितिका कार्यकारी अध्यक्ष धर्मेन्द्र झा, कलाकार रवीन्द्र झा, नेपाल चलचित्र सङघका अध्यक्ष नरेन्द्र महर्जन, निर्देशक गणेशदेव पाण्डे, लेखक समीप्याराज तिमल्सेना लगायतको उपस्थिति रहेको थियो ।