काठमाडौं – विद्युतीय गाडी (इलेक्ट्रिक भेहिकल) को आकर्षक बजार बनिरहेको नेपालमै एक चिनियाँ कम्पनीले उत्पादन थाल्नेगरी सम्झौता गरेको छ ।

चीनको सिमेन गोल्ड ड्रागन अटोबडीले ३ अर्ब रुपैयाँ लगानी गरी वार्षिक पाँच हजार थान गाडी उत्पादन गर्नेगरी नेपाली साझेदारसँग सम्झौता गरेको हो । ऊर्जा उपलब्धतामा सफलता हासिल गरेको नेपालमा चीन र भारतमा निर्मित विद्युतीय गाडी आयात हुने गरेको छ ।

ड्रागन अटोबडीले विद्युतीय गाडी उत्पादन गर्न कोशी एनके मोटर्ससँगै सहकार्य सम्झौता गरेको हो । कम्पनीले पहिलो चरणमा व्यवसायिक प्रयोजनमा उपयोग हुने चारपाङ्ग्रे विद्युतीय सवारीसाधन उत्पादन गर्ने जनाएको छ ।

विद्युतीय गाडी उत्पादन गर्ने प्लान्ट मोरङको बूढीगङ्गामा राखिनेछ । प्लान्ट स्थापना निम्ति नेपाली साझेदार कम्पनीले १५ बिगाहा जमिन लिइसकेको छ ।