दोलखा– जिल्लाको जिरी नगरपालिकाले चालु वर्ष वितरण गरेका सत् प्रतिशत योजनाको सम्झौता सम्पन्न भएको पाइएको छ ।

नगरले चालु वर्ष ९ वटा वडामा एक सय ९४ वटा योजना वितरण गरेकोमा चालु वर्ष सकिन करिब तीन महिना बाकी रहँदै पालिकाले सबै योजनाको सम्झौता गरेको जिरी नगरपालिका नगरप्रमुख मित्र जिरेल बताए ।

नगरपालिकाले आइतबार जिल्लाका स्थानीय मिडिया रेडियो सँग प्रत्यक्ष भेटघाट कार्यक्रमको आयोजना गरेर चालु वर्षका योजना तथा अनुदान कार्यान्वयनको प्रगति सार्वजनिक गरेको थियो ।

नगरपालिका चालु वर्ष वडा नम्बर-१मा १५ वटा योजना वितरण तथा सञ्चालन गरेको थियो भने,वडा नम्बर-२ मा १७ वटा, वडा नम्बर-३ मा २१, वडा नम्बर-४ मा २५, वडा नम्बर-५ मा २२ वटा वितरण गरेको थियो।

त्यसै गरी वडा नम्बर-६ मा १५, वडा नम्बर-७ मा १३, वडा नम्बर-८ मा सबैभन्दा बढी २९ वटा र ९ मा २५ वटा गरी एक सय ९४ वटा योजना वितरण गरेको नगर उपप्रमुख कृष्णमाया बुढाथोकीले बताइन् ।

उपाध्यक्ष बुढाथोकीका अनुसार सम्झौता गरिएका योजनाहरूमध्ये एक सय ५२ वटा योजनाको निर्माण सम्पन्न भई अन्तिम भुक्तानी समेत दिइसकेको उनले बताइन् । समग्रमा चालु वर्ष सकिन अझै करिब ३ महिना बाकी रहँदा नगरले २३.५६ प्रतिशत वित्तीय प्रगति गरेको नगरपालिकाले जनाएको छ।

नगरले चालु वर्षको असोजमा योजना सम्झौता गर्न  घुम्ती सेवा शिविर सञ्चालन समेत गरेको थियो। नगरले चालु वर्ष पूर्वाधार विकास तर्फ १५ करोड २ लाख ५६ हजार बजेट विनियोजन गरेमा ३ करोड ४८ लाख ५४ हजार रकम बराबरको योजनाको काम सम्पन्न भई भुक्तानी दिइसकेको नगरले जनाएको छ ।

जिरी नगरपालिकाको आन्तरिक आम्दानीको स्रोत न्यून रहेको पाइएको छ।गत वर्ष करिब ४२ लाख आन्तरिक आम्दानी गरेको नगरले यस वर्ष पनि सोही हाराहारीमा आन्तरिक आम्दानी राजस्व संकलन गर्ने जनाएको छ।यस नगरले चालु आर्थिक वर्ष२०८०/०८१ मा ५६ करोड ४६ लाख २३ हजार बजेट ल्याएको थियो ।

उक्त बजेट मध्ये हालसम्म २४ करोड १४ लाख ५६ हजार खर्च भएको पाइएको छ ।प्रतिशतको हिसाबले जिरीले हालसम्म करिब ४२.७६ प्रतिशत बजेट खर्च गरेको पाइएको छ ।

– सुबास बस्नेत