काठमाडौं – चीनको बोर ग्रुप अफ होटल चाइना र नेपालको साखः ग्रुपबीच कपिलवस्तुको गोरुसिङ्गेमा २ अर्ब रुपैयाँ लगानी गरी सुविधासम्पन्न रिसोर्ट बनाउने सहमति भएको छ ।

काठमाडौंमा जारी लगानी सम्मेलनमा दुई लगानी कम्पनीबीच ७० कोठे रिसोर्ट बनाउने सम्झौता भएको हो । होटल निर्माण गर्न नेपाली र चिनियाँ कम्पनीसँग हङकङको अनफरमन ग्रुप पनि जोडिएको छ ।

अर्थमन्त्री वर्षमान पुनको उपस्थितिमा साखः एण्ड कम्पनीका अध्यक्ष किरण साख र अनफरमन ग्रुप अध्यक्ष लि पिङले हस्ताक्षर गरेका हुन्‌ । हस्ताक्षर समारोहमा लगानी बोर्डका अध्यक्ष सुशील भट्ट पनि उपस्थित थिए ।

२२ बिगाहा क्षेत्रफलमा फैलने अत्याधुनिक र सुविधासम्पन्न रिसोर्टको एउटा कोठामा एक रात बिताउन ५५ हजार रुपैयाँ तिर्नुपर्ने बताइएको छ । बोर ग्रुपले जापान, लाओस, कम्बोडिया, भियतनाम र चीनमा होटल व्यवसाय सञ्‍चालन गरिरहेको छ ।