काठमाडौं– इलाम–२ मा हिजो भएको उपनिर्वाचनको मतगणनाका लागि सर्वपक्षीय र सर्वदलीय बैठक जारी रहेको छ ।

बैठकले मतगणनाका बारेमा मापदण्ड तय गर्नेछ । इलामका प्रमुख जिल्ला अधिकारी इन्द्रदेव यादवले सर्वदलीय बैठक सकिएपछि मतगणना सुरु हुने जानकारी दिए ।

हिजो उपनिर्वाचन सम्पन्न भएपछि राति अबेर सबै मतपेटिका सदरमुकामस्थित गौतमबुद्ध सभागृहस्थित गणनास्थल ल्याइएको छ।

इलामको उपनिर्वाचनमा एक लाख १५ हजार ८ सय ८९ मतदातामध्ये ६९ हजार दुई सय ८७ मत खसेको छ । यो समग्रमा ६० प्रतिशत हो ।

उपनिर्वाचनमा १२ राजनीतिक दल र सात स्वतन्त्र उम्मेदवार गरी १९ जना चुनावी मैदानमा छन् ।

प्रतिनिधिसभा सदस्य सुवासचन्द्र नेम्बाङको गत भदौ २६ मा निधन भएपछि रिक्त क्षेत्रमा हिजो उपनिर्वाचन भएको हो।