इलाम – इलाम-२ मा भइरहेको उपनिर्वाचनमा निर्वाचन आचारसंहिता उल्लङ्घन गरेका राष्ट्रिय स्वतन्त्र पार्टी (रास्वपा) उम्मेदवार मिलन लिम्बूलाई कसुरको मात्रा हेरेर कारबाही हुने निर्वाचन आयोगले जानकारी दिएको छ ।

रास्वपा उम्मेदवार लिम्बूले आज (शनिबार) भइरहेको उपनिर्वाचन मतदान क्रममा पार्टीको निर्वाचन चिह्न अंकित घण्टीको लोगो भएको ब्याच लगाएर मतदान गरेका थिए ।

उनले पार्टीको चुनाव चिह्न प्रष्ट देखिने ब्याच कोटको कलरमा झुण्ड्याएर इलामको माङसेबुङ-२, दहगाउँस्थित जनता कल्याण आधारभूत विद्यालयमा रहेको मतदान स्थलको ‘ख’ केन्द्रमा भोट खसालेका थिए ।

निर्वाचन आंचारहिताको १८ नम्बर बुँदाको ‘क’ मा राजनीति दल र उम्मेदवार प्रतिनिधिले निर्वाचन चिह्न वा मत संकेत भएको पहिरन र ब्याच लगाउन नहुने स्पष्ट लेखिएको छ ।

इलाम-२ मा रास्वपा उम्मेदवार लिम्बूद्वारा आचारसंहिता उल्लङ्घन

प्रमुख निर्वाचन आयुक्त दिनेश थपलियाले लिम्बूलाई जिल्ला निर्वाचन कार्यालयले सिफारिस गरेबमाेजिम कारबाही हुने बताए । उनले भने, ‘आचारसंहिताको उल्लङ्घन गर्नेलाई कसुरको मात्र हेरी कारबाही हुन्छ । आचारसंहिता उल्लङ्घनबारे कसुर अनुसार कारबाही हुने भनी लेखिएको छ ।’

थपलियाका अनुसार मतदान सकिएपछि, नतिजा सार्वजनिक भएपछि या विजयी भइसकेपछि पनि जिल्लाको सिफारिसबमोजिम निर्वाचन आचारसंहिता उल्लङ्घन गर्नेलाई कारबाही हुनेछ ।

यता जिल्ला निर्वाचन आचारसंहिता अनुगमन समितिले लिम्बूलाई स्पष्टीकरण सोधिसकेको जानकारी दिएको छ ।