काठमाडौं– किशोरीहरुलाई बेचबिखन गर्ने उद्देश्यका साथ नेपाल–भारत नाका झापाको मेचीनगर लैजान लागेको अवस्थामा प्रहरीले २ जनालाई पक्राउ गरेको छ ।

पक्राउ पर्नेमा रामेछापको खाँडादेवी गाउँपालिका–२ घर भइ काठमाडौंको चन्द्रागिरी बस्ने ३१ वर्षीय भुवन तामाङ र काभ्रेको खानीखोला गाउँपालिका–१ घर भएका २९ वर्षीय आइते बहादुर लोप्चन छन् ।

उनीहरुले केही किशोरीहरुलाई झापाको बिर्तामोड क्षेत्रमा रङ लगाउने काममा लगाइदिने भन्दै काठमाडौंबाट झापातर्फ लैजान लागेका थिए ।

उनीहरुले ती किशोरीलाई कसैले सोधपुछ गरेमा आफ्नो वास्तविक नाम नबताउन र भाउजु बिरामी भएका कारण विर्तामोड जान लागेको भनेर भन्न लगाएका थिए ।

किशोरीलाई बेचबिखन गर्न लागेको शंकाका आधारमा महानगरीय प्रहरी बृत्त थानकोटबाट खटिएको टोलीले २ जनालाई पक्राउ गरेको हो ।

ना ७ ख ५७०२ नम्बरको बसमार्फत झापाको मेचीनगर पु¥याइन लागिएकी किशोरीहरुको पनि उद्दार गरिएको प्रहरीले जनाएको छ ।