काठमाडौं– राष्ट्रिय योजना आयोगका सदस्य रामकुमार फुयालले शैलुङको विकासको लागि एकिकृत गुरुयोजना बनाएर अघि बढ्नुपर्ने बताएका छन् ।

फुँयालले काभ्रेपलाञ्चोक, सिन्धुपाल्चोकको बोथान, थाङपाल, याङरी लगायतका स्थानबाट र सिन्धुलीको सिन्धुलीगढीबाट रामेछाप हुँदै शैलुङसम्मको गुरु योजना बनाएर अघि बढ्नुपर्ने बताए ।

शैलुङलाई पर्यटकीय क्षेत्रका रुपमा चिनिन्छ । फुयालकाअनुसार ती क्षेत्रका साँस्कृतिक, धार्मिक र पुरातात्विक स्थलहरुलाई समेटेर शैलुङलाइ केन्द्रविन्दू बनाइ ट्रेकिङ ट्रायलका रुपमा अघि बढाउनुपर्ने समेत जोड दिए ।

शनिवार ह्याङला दोलखा काठमाडौं तामाङ समाजले अन्तरक्रियात्मक तथा ‘शैलुङ यात्रा’ बृत्तचित्र प्रदर्शनी कार्यक्रमको आयोजना गरेको थियो ।
कार्यक्रममा पूर्व सँस्कृति पर्यटन तथा नागरिक उड्डयन मन्त्री आनन्द पोखरेलले सबै मिलेर शैलुङ विकास गर्नुपर्ने बताए ।

‘शैलुङको प्राकृतिक स्वरुपलाइ संरक्षित गर्दै स्थानीय निकाय नियन्त्रित योजनामा आधारित निजी क्षेत्रलाई समेत स्वागत गर्न सकेमा शैलुङको विकास हुनेछ’ उनले भने ‘सय थुम्काको संगम, प्रकृति, सँस्कृति र ऐतिहासिक महत्वको धरोहर नियमित पर्यटकको पर्खाइमा छ’ ।

शैलुङको प्राकृतिक महत्वलाई यथावत राख्दै पर्यटकीय पूर्वाधार निर्माणमा सबै जुट्न पर्ने जरुरी रहेको र आगामी दिनमा कसरी शैलुङलाई विकसित गराउन सकिन्छ भन्ने उद्धेश्यका साथ कार्यक्रमको आयोजना गरेको शैलुङ गाउँपालिकाका अध्यक्ष भरत दुलालले जानकारी दिए ।

समानजले करिब १५ वर्षअघि तयार पारेको उक्त वृत्ततित्रमा शैलुङमा रहेको बुद्धको पाइला, १२ वर्षे मेलामा लाग्ने गुफा, महादेवको मन्दिर, बाघेढुंगा, शैलुङ क्षेत्रमा पाइने १ सयभन्दा बढि जडीबुटीहरु र १ सय वटा थुम्का, स्थानीय भेषभुषा र रहनसहनलाई समेटिएको थियो ।