गृहमन्त्रालयले जिल्ला प्रहरी परिसर काठमाडौं र उपत्यका अपराध अनुसन्धान कार्यालयका प्रमुख (एसएसपी) ८ महिनामै फेरेको छ ।
गृहमन्त्री रवि लामिछानेले काठमाडौं प्रहरी प्रमुखमा अपराध अनुसन्धान विभागबाट एसएसपी वसन्त रजौरेलाई सरुवा गरेका छन् ।
उता उपत्यका अपराध अनुसन्धान कार्यालय प्रमुखको जिम्मेवारीमा एसएसपी सानुराम भट्टराईलाई ल्याइएको छ । उनी यसअघि राष्ट्रिय सुरक्षा परिषद्मा थिए ।
काठमाडौं प्रहरी परिसरमा यसअघि एसएसपी भूपेन्द्र खत्री प्रमुख थिए ।
अपराध अनुसन्धान प्रमुखमा सोमेन्द्र सिंह राठौर प्रमुख थिए । खत्रीको सरुवा अपराध अनुसन्धान विभागमा हुँदा राठौरको राष्ट्रिय सुरक्षा परिषद्मा सरुवा भएको छ ।
काठमाडौं प्रहरी परिसरका एसएसपी खत्रीलाई अपराध अनुसन्धान विभागमा सरुवा गरिएको छ ।
कोशी प्रदेश तालिम निर्देशनालयका एसएसपी राजन अधिकारीलाई प्रहरी प्रधान कार्यालय तालिम निर्देशनालयमा ल्याइएको छ ।
त्यहाँका एसएसपी अभयनारायण काफ्लेलाई कोशी प्रदेश तालिम निर्देशनालयमा सरुवा गरिएको छ ।
गृह मन्त्रालयले गत भदौ ४ गते नेपाल प्रहरीका ५ जना एसएसपीहरूको सरुवाका क्रममा काठमाडौं प्रहरी परिसर प्रमुखमा खत्री र अपराध अनुसन्धानको प्रमुखमा राठौरलाई सरुवा गरेको थियो । अब उनीहरूको ८ महिनामै सरुवा गरिएको हो ।
प्रतिक्रिया