काठमाडौं– मोहन वैद्य नेतृत्वको क्रान्तिकारी कम्युनिष्ट पार्टी नेपाल र सन्तबहादुर नेपालीले नेतृत्व गरेको नेकपा (मशाल) वीच पार्टी एकता गर्ने सहमति जुटेको छ ।

आगामी मे १ गते अन्तर्राष्ट्रिय मजदुर दिवसको अवसर पारेर दुई दलबीच एकता गरिने विहीबार वैद्य र नेपालीले संयुक्त वक्तव्यमार्फत जानकारी दिएका छन् ।

 माओवादी नेता प्रचण्डका राजनीतिक गुरुसमेत मानिने मोहन वैद्यले प्रचण्डसँग अलग भएर माओवादी पार्टी पुनर्गठन गरेका थिए । तर, उनको समूहमा रहेका रामबहादुर थापा बादल प्रचण्ड समूहमै फर्किएका थिए  नेत्रविक्रम चन्द विप्लव अर्कै दल खोलेर हिंसात्मक सङ्घर्षमा होमिएका थिए । वैद्यले भने माओवादीको नाम फेरेर ‘क्रान्तिकारी कम्युनिष्ट पार्टी नेपाल’ चलाउँदै आएका छन् ।

त्यसो त विप्लव समूहमा समेत फुट आएसकेको छ । धर्मेन्द्र बास्तोला लगायतका लगायतका नेताहरूले विप्लवको साथ छाडेर नेकपा (बहुमत) खोलेका छन् ।

उता मोहन वैद्यसँग एकता गर्न तयार रहेका अर्घाखाँचीका सन्तबहादुर नेपाली यसअघि मोहनविक्रम सिंह, चित्रबहादुर केसीहरूले नेतृत्व गरेको नेकपा (मसाल) मा आवद्ध थिए । सादगी नेताका रुपमा चिनिने नेपालीले केसी र सिंहलाई छाडेर विद्रोह गरी नेकपा (मशाल) पुनर्गठन गरेका थिए ।

माओवादी केन्द्रका नेता एवं प्रधानमन्त्री प्रचण्डले पूर्वमाओवादी समूहहरुवीच एकता हुने बारम्बार चर्चा गरिरहे पनि मोहन वैद्य प्रचण्डसँग मिल्न तयार देखिएका छैनन् । डा. बाबुराम भट्टराई पनि प्रचण्डसँग टाढिएका छन् । विप्लवले पनि प्रचण्डसँग पार्टी एकता गर्न चाहेको देखिँदैन । यहीबेला मोहन वैद्यले पूर्वमसाल समूहसँग एकताको घोषणा गरेका हुन् ।