काठमाडौं– चलचित्र ‘पुजार सार्की’ जापानभर प्रदर्शनमा आउने भएको छ । जापानमा प्रदर्शनको अधिकार पाएको ‘लाइफ अफ फ्रेन्ड गुप्र’का खिम राज शाहका अनुसार टोकियोमा मे २६ बाट फिल्म प्रदर्शनमा आउनेछ । 

टोकियोका दर्शक भने पल शाहसँगै बसेर फिल्म हेर्न पाउने भएका छन् । शाहका अनुसार मे २६ मा त्यहाँस्थित नाकानो जेरो हलमा हुने शोमा पल सहभागी हुने कार्यक्रम पक्का भएको छ । 

शाहका अनुसार टोकियोसहित जापानका प्रमुख दुई दर्जन सहरमा चलचित्र एक साथ प्रदर्शनमा आउँदै छ । बाँकी केही स्थानमा प्रदर्शन मिति छिट्टै सार्वजनिक गर्ने तयारी रहेको शाहले बताए । 

मल्टिस्टार फिल्म ‘पुजार सार्की’ नेपालमा जेठ १० बाट प्रदर्शनमा आउँदै छ । तीन नायक आर्यन सिग्देल, प्रदीप खड्का र पल शाह यस फिल्मको मुख्य भूमिका छन् । 

यस फिल्ममा नायिकाद्वय परीक्षा लिम्बू र अञ्जना बराइली पनि मुख्य भूमिकामा रहेका छन् । वर्षकै प्रतीक्षित फिल्मका रुपमा ‘पुजार सार्की’ले चर्चा बटुलेको छ ।