भारतको केन्द्रीय चुनाव आयोगले प्रधानमन्त्री नरेन्द्र मोदी र कांग्रेस नेता राहुल गान्धीलाई आचार संहिता उल्लंघनको आरोपमा पत्र पठाएको छ ।

आयोगले दुवै नेताले दिएको सार्वजनिक अभिव्यक्तिलाई लिएर भाजपा र कांग्रेस अध्यक्षमा नाममा पत्र पठाएको हो ।

कांग्रेस र भाजपा दुवैकोतर्फबाट एक-अर्का नेताहरुविरुद्ध चुनावी प्रचारका क्रममा घृणा फैलाउने, धर्म, जाति, समुदाय र भाषाको आधारमा विभाजित गर्न खोजेको आरोप लगाइएको छ ।

दुवै पार्टीको तर्फबाट एकअर्काविरुद्ध चुनाव आयोगमा उजुरी परेको थियो ।

त्यसपछि चुनाव आयोगले कांग्रेस प्रमुख मल्लिकार्जुन खड्गे र बीजेपी अध्यक्ष जगत प्रकाश नड्डालाई पत्र पठाउँदै २९ अप्रिलसम्म जवाफ दिन भनेको छ ।

चुनाव आयोगले त्यस पत्रमा राष्ट्रिय पार्टी भएका नाताले चुनाव प्रचारका क्रममा आदर्श आचार संहिताको पालनालाई लिएर मानक बनाउन दुवै  नेतालाई भनेको छ ।

तर आयोगले दुई नेताले कुन चुनावी अभियानका क्रममा आचारसंहिता उल्लंघन गरेको कुरा भने खुलाएको छैन । आयोगले दुवै नेताहरू आफ्नो भाषणका लागि जिम्मेवार हुनुपर्ने कुरामा पनि सचेत गराएको हो ।