वनमा लागेको डढेलो बस्तीमा पस्दा खोटाङको बाराहापोखरी गाउँपालिका-१ मा कम्तीमा १३ घर जलेका छन् । आगलागीबाट ११ परिवारको विचल्ली भएको छ ।

बुधबार दिउँसो स्थानीय सामुदायिक वनमा लागेको डढेलो गाउँमा पस्दा खाली तीनवटासहित १३ घर, ७ वटा मतान, २ वटा गोठ, १ वटा बाख्राको खोर र एउटा भान्सा घर जलेका हुन् ।

डढेलोले बराहपोखरीको भिरगाउँका मोहनलाल थापा मगरका दुईवटा घर र मतान, पूर्णबहादुर मगरको एउटा घर र तीनवटा मतान, भद्रसिं हमगरको घर र दुई वटा गोठ जलेका छन् ।

त्यस्तै सुवास थापा मगरको घर र मतान र मदन थापा मगरको घर जलेको जिल्ला प्रहरी कार्यालय खोटाङका डीएसपी पुरुषोत्तम खड्काले बताए ।

डढेलोले दान्सिङटारका गंगामाया मगरका दुईवटा घर र दुईवटा मतान, ४० वटा बाख्रा, आधा तोला सुन तथा नगद ५० हजार लगायत जलेको छ ।

वडाध्यक्ष ढकबहादुर कार्कीले खोर्सानेका सुमन मगर र गहतेका लेखराज खतिवडाको घर पनि जलेको बताएका छन् । डढेलोले डाँडाखर्कका होमबहादुर कटुवाल र पदमबहादुर कटवालको खाली घर पनि जलेको छ । खोर्सानेका छकुमार राईको घरसमेत जलेको छ ।

प्रहरीका अनुसार स्थानीय रक्तमाला सामुदायिक वनमा लागेको डढेलेले भञ्ज्याङका बमबहादुर मगरको भान्छा घर र बाख्राको खोर जलेको छ।