बेइजिङ– दक्षिण चीनमा भारी वर्षा र बाढीका कारण एक लाखभन्दा बढी मानिसलाई स्थानान्तरण गरिएको छ । सरकारले प्रभावित क्षेत्रमा मंगलबार र बुधवार भारी वर्षा हुने चेतावनी दिए लगत्तै उनीहरूलाई स्थानान्तरण गरिएको हो ।

हालैका दिनहरूमा ग्वाङ्डोङमा भीषण वर्षा भइरहँदा नदीको स्तर बढेको छ । जसका कारण ठूलो बाढी आउन सक्ने सम्भावना छ।

मंगलबार सेन्जेनको मेगासिटीमा भारी वर्षा भएको छ । बाढीको जोखिम अझै उच्च रहेको मौसम विभागले बताएको छ । मानिसहरूलाई सम्भावित विपदबाट सतर्क रहन आग्रह गरिएको छ ।

बेई नदीको सहायक नदीले घेरिएको छिङयुआनबाट ४५ हजारभन्दा बढी मानिसलाई सुरक्षित स्थानमा सारिएको सरकारी सञ्चारमाध्यमले जनाएका छन् ।

चिनियाँ राज्य समाचार एजेन्सी सिन्ह्वाले साताको अन्त्यमा भारी वर्षा सुरु भएदेखि गुआङडोङका १ लाख १० हजार बासिन्दालाई स्थानान्तरण गरिएको बताएको छ।

चीनमा बाढीले हालसम्म चार जनाको मृत्यु भइसकेको छ भने १० जना बेपत्ता छन् ।