काठमाडौं । हिमालयन हाइड्रो एक्स्पो भोलि (बैशाख १२) देखि शुरु हुने भएको छ । स्वतन्त्र ऊर्जा उत्पादकहरुको संस्था, नेपाल (इप्पान)ले काठमाडौं भृकुटीमण्डपमा एक्स्पो आयोजना गर्न लागेको हो ।

तीन दिनसम्म आयोजना हुने एक्स्पोमा जलविद्युत विकास निम्ति आर्थिक, प्राविधिक र सामाजिक लगायत अन्तरसम्बन्धित विभिन्न मामिलामा प्राविधिक सेसन हुने इप्पानले जानकारी दिएको छ ।

एक्स्पोको पहिलो दिन भोलि बुधबार बिहान ६ः३० बजे इप्पानले विद्युतीय सवारीसाधन (ईभी) र्याली निकाल्ने र ११ बजेदेखि प्राविधिक सेसनहरू शुरु गर्ने जनाएको छ । पहिलो दिनको सेसनमा नेपाल विद्युत प्राधिकरणका कार्यकारी निर्देशक कुलमान घिसिङ र भारतको अडानी ग्रुपका उपाध्यक्ष जीत अडानी पनि सहभागी हुनेछन् ।

दोस्रो दिन १३ गते राष्ट्रपति रामचन्द्र पौडेलले एक्स्पो उद्घाटन गर्नेछन् । सो दिनको प्राविधिक सेसनमा संसद्को पूर्वाधार विकास समितिका सभापति दीपकबहादुर सिंहसहित ५ सांसद्हरू सहभागी हुने इप्पानले जानकारी दिएको छ ।

एक्स्पोको अन्तिम दिन वैशाख १४ गते ऊर्जामन्त्री शक्तिबहादुर बस्नेत र अर्थमन्त्री वर्षमान पुन अध्यक्षतामा प्राविधिक सत्रहरू चलाइने र समापन गरिने इप्पानले जनाएको छ ।