काठमाडौं– सरकारले यही वैशाख १६ र १७ गते आयोजना गर्न लागेको ‘नेपाल इन्भेष्टमेन्ट समिट २०२४’ अर्थात् तेस्रो लगानी सम्मेलनमा ३६ देशबाट ४६५ जनाले सहभागिता जनाउने कन्फर्मेसन पठाएका छन् । 

लगानी बोर्डका प्रवक्ता प्रद्युम्न उपाध्यायका अनुसार नेपालले सम्मेलनमा सहभागी हुनका लागि १३५५ जनालाई औपचारिक पत्र पठाएकोमा ४६५ जना विभिन्न देशका कूटनीतिज्ञ, विभिन्न संस्थाका प्रतिनिधि र लगानीकर्ताहरूले सहभागिताको लागि कन्फर्मेसन पठाएका हुन् ।

लगानी बोर्डकाअनुसार अहिलेसम्म लगानी सम्मेलनमा सबैभन्दा धेरै चीनबाट ६४ जनाले सहभागी हुने कन्फर्मेसन पठाएका छन् । त्यस्तै, भारतबाट ५७, जर्मनीबाट १२, बेलायतबाट ११, अमेरिका र बंगलादेशबाट १०-१० जना, युएई र जापानबाट ८-८ जना, दक्षिण कोरियाबाट ७ जना, पाकिस्तान र अस्ट्रेलियाबाट ६-६ जनाले सहभागिताको लागि कन्फर्मेसन पठाएका छन् ।

सिंगापुर, मलेसिया, रसिया, फिनल्यान्ड, कोलम्बिया, क्यानडा, कतार, बेल्जियम, बहराइन, अस्ट्रिया, भियतनाम, थाइल्यान्ड, स्विट्जरल्यान्ड, साउदी अरेबिया, श्रीलंका लगायतका मुलुकबाट पनि लगानी सम्मेलनमा सहभागिता जनाउने कन्फर्मेसन आएको लगानी बोर्डले जनाएको छ । 

बोर्डका अनुसार सम्मेलनमा अहिलेसम्मको कन्फर्मेसनअनुसार सबैभन्दा धेरै नेपाली लगानीकर्ताहरू सहभागी हुनेछन् । साथै इयू र विश्वका विभिन्न अन्तर्राष्ट्रिय कम्पनी तथा संस्थाका ६० भन्दा धेरै प्रतिनिधिहरूले पनि सहभागी हुने कन्फर्मेसन पठाएका छन् ।

लगानी सम्मेलन शुरु हुन अझै १० दिन बाँकी रहेकोले कन्फर्मेसनको संख्या बढ्दै जाने लगानी बोर्डका प्रवक्ता उपाध्यायले बताएका छन् । बोर्डको तथ्यांकअनुसार यसअघि सन् २०१७ मा भएको पहिलो लगानी सम्मेलनमा २१ देशका २५७ जना विदेशी र ५०० जना नेपाली लगानीकर्ताको सहभागिता भएको थियो । 

त्यस्तै, सन् २०१९ मा भएको दोस्रो लगानी सम्मेलनमा ४० देशका ७३५ जना विदेशी र ६ सय जना नेपाली लगानीकर्ताको सहभागिता भएको थियो ।