काठमाडौँ– नेपाली कांग्रेसले सहकारी ठगी प्रकरणमा उपप्रधान तथा गृहमन्त्री रवि लामिछानेमाथि अनुसन्धानका लागि संसदीय छानबिन समिति गठन गर्न पुनः माग गरेको छ ।

आज प्रतिनिधिसभा बैठकमा कांग्रेस सांसद रामहरी खतिवडाले सहकारी ठगीमा गृहमन्त्री लामिछानेको नाम देखिएकाले उनीमाथि छानबिन गर्नुपर्ने धारणा राखेका छन् ।

प्रतिनिधिसभाको बैठक शुरु हुनासाथ नेपाली कांग्रेसका सांसदहरुले उठेर विरोध जनाएपछि सभामुखले सांसद खतिवडालाई समय दिएका थिए । खतिवडाले लामिछाने गृहमन्त्री बनेदेखि सहकारी ठगिको छानबिन अवरुद्ध भएको दाबी समेत गरे ।

उनले सांसद खतिवडाले प्रधानमन्त्रीले पनि सहकारी ठगको बचाउ गरेको आरोप लगाउँदै संसदीय छानिबन आवश्यक रहेको बताए ।

सांसद खतिवडाले आफूहरुका माग सरकारले नसुनेको बताउदै सहकारीको एक अर्ब भन्दा बढी गोरखा मिडियामा लगानी भएको र सो मिडियाको प्रबन्ध निर्देशक लामिछाने रहेकाले छानबिनको माग गरेको बताए ।

उनले आफूहरुले कसैप्रति पूर्वाग्रह नराखेको बताउदै दोषी नभए छानबिनका लागि किन तयार नभएको भन्दै प्रश्न गरेका थिए ।

प्रधानमन्त्री पुष्पकमल दाहाल प्रचण्डले गठबन्धनको प्रमुखको रुपमा बोलेर दोषी उम्काउने प्रयास गरेको आरोप लगाए । यसले सरकारले संसद चल्न नदिने नियत राखेको आशंका पैदा भएको बताए ।