काठमाडौं– गायिका खुसी थुलुङ्ग राईको पहिलो गीतिसङ्ग्रह ‘खुसीका रङ्गहरू’ सार्वजनिक भएको छ । सोमबार दरबारमार्गमा एक कार्यक्रमको आयोजना गरी उनले गीतिसङ्ग्रहसँगै म्युजिक भिडियो  ‘प्रेमको अर्थ’ औपचारिक रूपमा सार्वजनिक गरेकी हुन् ।

गीतिसङ्ग्रह पूर्वपर्यटनमन्त्री सुदन किराँतीले औपचारिक रूपमा सार्वजनिक गरेको हुन् । उनले सार्वजनिक गीतिसङ्ग्रहलाई सफलताको शुभकामना दिँदै गायिका खुसीको कामको प्रशंसा गरे ।

उनले भने, ‘म गीतसङ्गीत धेरै बुझ्दिनँ तर राम्रो आवाज भएका, कला भएका सर्जकलाई प्रोत्साहन गर्न उपस्थित हुन्छु । खुसी बहिनीले गीतसङगीतलाई निरन्तरता दिएर अगाडि बढ्नु पर्छ, निकै सुमधुर स्वर रहेको छ ।’

गायिका खुसीले आफ्नो पहिलो गीतिसङ्ग्रह सार्वजनिक समारोहमा पाएको माया, हौसला र प्रतिक्रियाले थप कामका लागि हौसला मिलेको बताइन् । कृतज्ञता  व्यक्त गर्दै उनले भनिन्,  ‘मेरो पहिलो प्रयासमा पाएको हौसलालाई आगामी दिनमा प्रयोग गर्ने छु । गीतसङ्गीतको नयाँ मान्छे तर यस्तै प्रतिक्रियाले मलाई निरन्तरता दिन र गन्तव्यमा पुग्न प्रोत्साहन दिएको छ ।’

उनले सङ्ग्रहमा आठ गीत सङ्ग्रहित भएता पनि पहिलो गीत ‘प्रेमको अर्थ’ मात्र सार्वजनिक गरेकी छिन् । उक्त गीतमा क्रान्ति सुब्बाको शब्द र हरी लम्सालको सङगीत रहेको छ । गीतको भिडियोमा रुक्मान लिम्बू र करिश्मा श्रेष्ठले अभिनय गरेका छन् ।

हेर्नुहोस् भिडियो :