दाङ– लुम्बिनी प्रदेशमा नवनियुक्त मुख्यमन्त्री जोखबहादुर महराले पद तथा गोपनीयताको शपथ लिँदैछन् ।

बुटवलस्थित प्रदेश प्रमुखको कार्यालयमा आज दिउँसो पौने २ बजे शपथग्रहणका कार्यक्रम रहेको छ ।

नेकपा एमाले र नेकपा माओवादी केन्द्रको नयाँ समीकरण निर्माण भएसँगै मुख्यमन्त्री नियुक्त भएका नेकपा माओवादी, लुम्बिनी प्रदेश संसदीय दलका नेता महराले मुख्यमन्त्रीको सपथ लिन लागेका हुन् ।

मुख्यमन्त्रीको शपथसँगै उनले केही मन्त्रीलाई पनि सपथ ग्रहण गराउने छन् । तर, मन्त्रीहरूको नाम भने टुंगो लागिसकेको छैन ।

नेपाली कांग्रेसका तर्फबाट मुख्यमन्त्री रहेका डिल्लीबहादुर चौधरीले गत बिहीबार राजीनामा दिएपछि प्रदेश प्रमुख अमिक शेरचनले शुक्रबार महरालाई मुख्यमन्त्रीमा नियुक्त गरेका थिए ।

महरालाई माओवादीसहित एमाले, जसपा, नाउपा, नेकपा एस र स्वतन्त्रसहित ४८ जना सदस्यले समर्थन गरेका थिए ।