चितवन– जिल्लाको कालिका नगरपालिकामा खोरेतविरुद्धको खोप अभियान प्रारम्भ भएको छ । पालिकाको पशु सेवा शाखा र दुग्ध उत्पादन सहकारीहरुको समन्वयमा अभियान  थालिएको हो ।

अभियानअन्तर्गत पालिकाका  सबै वडाका ६ हजारभन्दा बढी पशुलाई खोप लगाइने पालिकाका पशु विकास अधिकृत ईश्वरीप्रसाद  पौडेलले जानकारी दिए । अभियान वैशाख ५ गते सम्म सञ्चालन हुनेछ ।

पहिलो चरणमा गाई, भैँसी र बङ्गुरलाई   खोप लगाइने पौडेलले जानकारी दिए । बाख्रालाई भने  भर्खरै पीपीआर रोगविरुद्धको खोप लगाएकाले केही समयपछि मात्र खोरेतविरुद्धको खोप लगाइने उनको भनाइ छ ।

पशु विकास अधिकृत पौडेलले खोरेत लागेका पशुको खुट्टा तथा मुखको वरिपरि घाउ हुने, गन्हाउने, पाक्ने,  ज्वरो आउनेलगायत लक्षण देखिने बताए ।