बागलुङ– जिल्लाको तुरतुरे ताल फुटेर बडिगाड खोलामा आएको बाढीले सडक बगाएपछि मध्यपहाडी पुष्पलाल लोकमार्ग अवरुद्ध भएको छ ।

बडिगाड गाउँपालिका र ढोरपाटन नगरपालिकाको सीमा तुरतुरेमा चार दिनदेखि मध्यपहाडी पुष्पलाल लोकमार्ग अवरुद्ध हुँदा पश्चिम बागलुङको यातायात सेवा प्रभावित भएको छ ।

लोकमार्ग खुल्न अझै तीन साता लाग्ने छ । सदरमुकाम बागलुङ बजारदेखि ढोरपाटन नगरपालिका, निसीखोला गाउँपालिका र तमानखोला गाउँपालिकासम्मको सिधा सडक सम्पर्क टुटेको छ । पश्चिमको व्यापारिक केन्द्र बुर्तिबाङबाट छोटो तथा लामो दूरीका सवारीसाधन ठप्प छन् ।
सदरमुकामसँगै पोखरा, बुटवल, काठमाडौँतर्फ गुड्ने सवारीसाधन बडिगाड गाउँपालिका–७ घोपर्नासम्म मात्रै पुग्ने गरेका छन् । बुर्तिबाङ क्षेत्रबाट छुट्ने सवारीसाधन ढोरपाटन नगरपालिका–२ तुरतुरे आएर रोकिन्छन् ।

लोकमार्ग अवरुद्ध भएको क्षेत्रमा झण्डै एक घण्टा हिँड्नुपर्ने अवस्था रहेको स्थानीयवासी दिनेश शर्माले बताए ।

आयोजनाका इञ्जिनीयर अर्जुन गौतमका अनुसार १० मिटर माथिबाट नयाँ मार्ग खोल्ने काम शुरु भएको छ । बाढीले झण्डै २५० मिटर सडक भत्काएको छ ।

लोकमार्ग पुरानै अवस्थामा फर्काउन समय लाग्ने देखिन्छ । गत वर्ष पहिराले बडिगाड खोला थुनिँदा करीब १०० किमी क्षेत्रफलमा ताल बनेको थियो । सोही ताल फुट्दा लोकमार्गमा क्षति पुगेको हो ।