काठमाडौं – ऊर्जा, जलस्रोत तथा सिँचाइमन्त्री शक्तिबहादुर बस्नेतले सौर्य ऊर्जालाई प्राथमिकतामा राख्न आवश्यक रहेको बताएका छन् ।

आइतबार प्रतिनिधिसभा बैठकमा अन्तर्राष्ट्रिय सौर्य गठबन्धनको स्थापनासँग सम्बन्धित सम्झौतामाथि छलफल गरियोस् भन्ने प्रस्तावको छलफलका क्रममा मन्त्री बस्नेतले उक्त कुरा बताएका हुन् ।

नेपालमा ऊर्जाको माग र खपत वर्षभरि नै लगभग समान रहेपनि जलविद्युत् उत्पादन भने वर्षायाममा बढ्ने र सुक्खायाममा घट्ने भएकाले सौर्य ऊर्जालाई प्राथमिकतामा राख्नुपर्ने उनको भनाइ छ ।

उनले सौर्य ऊर्जाको प्रर्वद्धनसहित ऊर्जा पहुँच र ऊर्जा सुरक्षालाई सुनिश्चित गर्नका लागि सौर्य गठबन्धन गठन भएको बताए । साथै, संयुक्त राष्ट्रसङ्घका सबै सदस्य राष्ट्रहरु लगायत एक सय १८ देशले हस्ताक्षर गरेको र ९७ देशले स्वीकृत गरेको बताए ।

जलवायु परिवर्तनका चुनौतीसँग जुध्नका लागि स्वच्छ ऊर्जा प्रयोगमा जोड दिने प्रतिबद्धताका लागि नेपालले सम्झौतापत्रमा हस्ताक्षर गरेको उनले बताए ।

त्यस्तै, बैठकमा अन्य सांसदहरुले सौर्य ऊर्जाका क्षेत्रमा ठुलो वैदेशिक लगानी भित्रयाउन आवश्यक रहेको धारणा राखेका थिए ।