न्युयोर्क– रुसले उत्तर कोरियामाथिको प्रतिबन्धको निगरानी गर्ने राष्ट्रसंघीय निगरानी संस्था बन्द गरेको छ । उत्तर कोरियाविरुद्धको प्रतिबन्धको वर्षौँदेखि निगरानी गरिरहेको संयुक्त राष्ट्रसङ्घका विज्ञहरूको प्यानल रूसले बन्द गरेको हो ।

रुसले युक्रेनमा प्रयोगका लागि ब्यालेस्टिक मिसाइलजस्ता उत्तर कोरियाली हतियारहरू खरिद गरेर नियम उल्लंघन गरेको रिपोर्टको छानबिन गरिरहेको प्यानलले गत हप्ता मात्रै जानकारी गराएको थियो । त्यसको बदलामा रूसले संयुक्त राष्ट्रसंघमा भिटो प्रयोग गरेर खारेज गरिदिएको हो ।

संयुक्त राष्ट्रसंघको सुरक्षा परिषद्ले प्योङयाङमाथि सन् २००६ देखि आणविक हतियार कार्यक्रमका लागि विभिन्न प्रतिबन्धहरू लगाएको छ। ती प्रतिबन्धहरू अझै पनि लागू छन्, तर उल्लङ्घनहरू अनुगमन गर्न स्थापना गरिएको विशेषज्ञ समूह अब खारेज हुने भएको अन्तराष्ट्रिय सञ्चारमाध्यमले जनाएका छन् ।

बिहीबार सुरक्षा परिषद्को मतदानमा रुसले स्थायी सदस्यको रूपमा आफ्नो भिटो शक्ति प्रयोग गरी नवीकरण रोक्नका लागि प्रयास गरेको थियो । जबकि उपस्थित १४ सदस्य राष्ट्रहरू मध्ये १३ ले यसको पक्षमा मतदान गरे। प्योङयाङको सबैभन्दा नजिकको सहयोगी चीन भने रूसको यस प्रयोगबाट अलग रहेको थियो ।

रुसको ब्लकले अमेरिका, बेलायत, दक्षिण कोरिया र अन्य पश्चिमी सहयोगीहरूबाट निन्दाको लहर चलाएको छ । यो पहिलो पटक रुसले प्यानल अवरुद्ध गरेको हो, जुन १४ वर्षको लागि संयुक्त राष्ट्र सुरक्षा परिषदद्वारा वार्षिक रूपमा नवीकरण गरिँदै आएको थियो ।

युक्रेनका विदेशमन्त्री दिमित्रो कुलेबाले सामाजिक सञ्जालमा रुसको भिटो युद्धमा उत्तर कोरियाली हतियार प्रयोग गरेको ‘दोषी निवेदन’ जस्तै भएको बताएका छन् ।