काठमाडौँ– भारतीय अभिनेत्री प्रियंका चोपडा पुनः बलिउड फिल्ममा देखिने चर्चा चलेको छ । लामो समयदेखि हलिउडमा व्यस्त नायिका पुनः बलिउड फिल्ममा देखिने कुराले चर्चा पाएको हो ।

प्रियंकाले आफूलाई ‘ग्लोबल स्टार’का रुपमा प्रमाणित गरिसकेकी छिन् । उनी अमेरिकी गायक तथा नायक निक नोजनसँग विवाह बन्धनमा बाँधिएपछि भारत बाहिर नै बढी समय बिताइरहेकी छिन् ।

भर्खरै प्रियंका पति र छोरीका साथमा भारत फर्किएकी छिन् । उनी अहिले मुम्बईमा छिन् । यससँगै उनी बलिउड फिल्ममा काम गर्नका लागि फिल्मकर्मीसँगको भेटघाटमा व्यस्त रहेको बुझिएको छ ।

उनी बलिउड फिल्मका लागि नै भारत फर्किएको भारतीय सञ्चार माध्यम अमर उजलाले उल्लेख गरेको छ । उनी अहिले प्रख्यात भारतीय निर्माता सञ्जयलीला भन्सालीसँग निरन्तर वार्तामा छिन् । भन्सालीसँग एक्सन फिल्मबारे कुरा भइरहेको चर्चा बाहिरिएको छ ।

यो फिल्मको स्क्रिप्ट चित्त बुझाए पनि प्रियंकाको समय तालिका मिल्न सकिरहेको छैन । छिटै बलिउड फिल्ममा अनुबन्ध हुन इच्छुक देखिएकी प्रियंकाले लिखित सहमति भने अहिलेसम्म जनाएकी छैनन् ।

सञ्जयबाहेक उनी नयाँ निर्माताहरुसँग संवादमा रहेको बुझिएको छ । उनले स्क्रिप्ट हेरिरहेकी छिन् ।

त्यस्तै, यस पटकको भारत यात्रामा प्रियंका आफ्नो प्रोडक्सन हाउसको काममा पनि केन्द्रित रहने बताइएको छ । उनले आफ्नो प्रोडक्सन हाउसबाट बढीमा चार प्रोजेक्ट गर्ने मनस्थिति बनाएकी छिन् ।