काठमाडौं– त्रिभुवन अन्तर्राष्ट्रिय विमानस्थलस्थित अध्यागमन कार्यालयका अध्यागमन अधिकृत अख्तियारको नियन्त्रणमा परेका छन् ।

अख्तियार दुरुपयोग अनुसन्धान आयोगले अध्यागमन अधिकृत कमल प्रसाद पराजुलीलाई मंगलबार नियन्त्रणमा लिएको हो ।

श्रम स्वीकृति नै नलिइ वैदेशिक रोजगारीमा जाने नेपालीलाई प्रस्थान अनुमति दिएको विषयमा अनुसन्धान गर्न पराजुलीलाई नियन्त्रणमा लिइएको अख्तियारका प्रवक्ता प्रदीपकुमार कोइरालाले जानकारी दिए ।

नेपालले श्रम अनुज्ञा नै जारी नगरेको मुलुकमा जाने नेपालीहरु संयुक्त अरब इमिरेट्सको दुबई तथा कतार ट्रान्जिट बनाएर त्रिभुवन अन्तर्राष्ट्रिय विमानस्थलबाटै जाने गरेको उजुरी अख्तियारमा परेको थियो । बिचौलियाहरुको प्रभावमा परेर विमानस्थलका अध्यागमन अधिकृतहरुले भिजिट भिसामा भनेर त्यस्ता नेपालीलाई प्रस्थान अनुमति दिने गरेका थिए ।

यसरी प्रस्थान अनुमति दिने व्यक्तिको अभिलेख समेत नराख्ने गरिएको अख्तियारको छानबिनबाट खुलेको छ ।

अख्तियार स्रोतका अनुसार बिचौलियाहरुको गिरोहको मिलेमतोमा विमानस्थलका अध्यागमन अधिकृतहरुले थुप्रै नेपालीलाई यस्तो प्रस्थान अनुमति दिइसकेका छन् ।