काठमाडौं– गायक पशुपति शर्माले गाएको गीत ‘लुट्न सके लुट कान्छा’  हटाएको विषयमा संसदमा सत्ता पक्ष र प्रतिपक्षबीच जुहारी चलेको छ ।

सोमबारको प्रतिनिधिसभा बैठकको शून्य समयमा प्रमुख प्रतिपक्षी नेपाली कांग्रेसका सांसद अमरेश कुमार सिंहले जनगायन गरेको भन्दै गायक पशुपति शर्मालाई आफ्नो तलबबाट २५ हजार पुरस्कार दिने घोषणा गरेपछि सत्ता पक्षका सांसदले प्रतिवाद गरेका छन् ।

सत्तारुढ दल नेकपाका सांसद झपटबहादुर रावलले शर्माको गीतलाई सरकारले प्रतिवन्ध नलागएको भन्दै प्रतिपक्षीका सांसदले नगद पुरस्कार नै घोषणा गरेपछि यसको रहस्य सार्वजनिक भएको बताए ।

‘एकजना सांसले २५ हजार पुरस्कार दिने घोषणा गरेपछि रहस्य बाहिर आएको छ । सरकारले कुनै पनि प्रतिवन्ध लगाएको छैन’ सांसद रावलले भने,‘ भगवान पशुपतिले जोगाउन नसकेको प्रतिपक्षीलाई गायक पशुपतिले रक्षा गरुन् !’

सुशील कोइरालाको पालमा गायक शर्माले ‘जापान पनि यही अमेरिका पनि यही’ भन्ने गीत गाएको र यो सरकारलाई राक्षस, यमराज, कुकुरको संज्ञा दिएर देश लुट्न प्रेरित गरेरको भन्दै सत्तापक्षका सांसदले आपत्ति जनाए ।

सांसद रावलले गायक शर्मालाई २५ हजार पुरस्कार घोषणा गर्ने कांग्रेस सांसद अमरेशले संसदमा सोही गीत गाएको खण्डमा आफ्नो एक महिनाको पारिश्रमिक दिने घोषणा गरे ।