काठमाडौं– सुन तस्करी प्रकरणको छानविनमा कैफियत गरेको आरोप लागेपछि सरकारले प्रहरीको केन्द्रीय अनुसन्धान ब्यूरो (सीआएबी) की प्रमुख एआइजी किरण बज्राचार्यलाई प्रहरी प्रधान कार्यालयमा सरुवा गरेको छ। उनको ठाउँमा एआइजी श्याम ज्ञवालीलाई सीआइबी प्रमुख बनाइएको छ।

शुक्रबार बसेको मन्त्रिपरिषद बैठकले छानविनका लागि सहज गराउन भन्दै बज्राचार्यको ठाउँमा ज्ञवालीलाई सीआईबीमा पठाएको हो ।

सुन तस्करीसम्बन्धी उच्चस्तरीय जाँचबुझ आयोगले विहीबार सरकारलाई बुझाएको प्रतिवेदनमा सीआइबीले छानविनमा कैफियत गरेको रिपोर्ट दिएको थियो । त्यसैका आधारमा सरकारले बज्राचार्जलाई सीआइबी प्रमुखबाट हटाएको हो ।

शुक्रबार साँझ बसेको मन्त्रिपरिषद बैठकले आयोगको प्रतिवेदन कार्यान्वयन गर्ने र दोषीमाथि कारवाही गर्ने निर्णय लिएको सूचना प्रविधि तथा सञ्चारमन्त्री रेखा शर्माले बताइन् ।

दुई एआईजीको सुरुवाबारे जानकारी दिँदै मन्त्री शर्माले भनिन्, ‘नेपाल प्रहरी प्रधान कार्यालय कार्यविभागबाट एआइजी श्याम ज्ञवालीलाई सीआइबीमा र एआइजी किरण बज्राचार्यलाई नेपाल प्रहरीको प्रधान कार्यालय कार्यविभागमा सुरुवा गर्ने निर्णय भएको छ ।’

मन्त्रिपरिषद बैठकको निर्णयबारे जानकारी दिँदै मन्त्री शर्माले भनिन्, ‘सुनको अबैध पैठारी (तस्करी) नियन्त्रण सम्बन्धी जुन हामीले जाँचबुझ आयोग बनाएका थियौं, त्यसले चैत १ गते गृहमन्त्रीलाई बुझाएको प्रतिवेदनको गम्भीर अध्ययन गरी तत्काल कार्यान्वयनको प्रक्रियामा लैजाने भन्ने क्याबिनेटले निर्णय गरेको छ ।’

मन्त्री शर्माले थपिन्, ‘पहिलो कुरा त यो प्रतिवेदन अध्ययन गर्नुपर्‍यो । हिजोमात्रै आयोगले गृहमन्त्रीलाई बुझायो । आज गृहमन्त्रीले प्रधानमन्त्रीलाई बुझाउनुभयो । यसको गम्भीरतालाई ख्याल गर्दै आजको आजै, प्रतिवेदन बुझेको केही घण्टामै क्याबिनेटको बैठक बसेर यो निर्णय गरिएको छ ।’

दोषी कसैलाई पनि सरकारले नछाड्ने मन्त्री शर्माले दाबी गरिन् । उनले भनिन्,‘यसमा प्रधानमन्त्रीज्यू लगायत सिंगो सरकारको स्पष्ट धारणा के हो भने दोषी कोही पनि छुट्नु हुन्न, निर्दोष कोही पनि पर्नुहुन्न भन्ने सुरुदेखि नै अडान छ । त्यो अडानमा को व्यक्ति, कस्तो व्यक्ति भन्ने कुरा रहेन । यसमा दोषी ठहर भइसकेपछि, प्रमाणले पुगेपछि जोसुकै पनि कारवाहीको दायरामा आउने कुरा स्वाभाविक भैहाल्यो ।’