काठमाडौं– गायक पशुपति शर्माको गीत युट्युवबाट हटाइएको विषयले संसदमा प्रवेश पाएको छ ।

सोमबार बसेको प्रतिनिधिसभा बैठकमा बोल्दै प्रमुख प्रतिपक्षी दल नेपाली कांग्रेसका सांसद अमरेश कुमार सिंहले दुई तिहाइको सरकारका अगाडि यस्तो गीत गाउन मिल्छ भन्दै कटाक्ष गरे ।

‘दुई तिहाइको सरकार अगाडि यस्तो गीत गाउन पाइन्छ ? जनताको भावना व्यक्त गर्न पाइन्छ ?’ बैठकमा सिंहले भने,‘ त्यस्तो गीत गाउनेको त मुखमा ताला लगाउनु पर्छ सुन्नेको कानमा मर्करी वा सिसा पगालेर राख्नुपर्छ ।’

सरकारको यस्तो बुझाइले लोकतन्त्रमाथि नै प्रश्न जन्मिएको उनको भनाइ थियो ।

सिंहले जनबोलिको गीत गाउने गायक पशुपति शर्मालाई आफ्नो फागुन महिनाको पारिश्रमिकबाट २५ हजार नगद सम्मान स्वरुप दिने घोषणा समेत गरे ।

जनताको भावना वुद्धिजीवीको भावना, गायकको भावनालाई सरकारले सम्मान नगरे जनताले पनि सरकारलाई सम्मान नगर्ने उनको भनाइ थियो ।

जनताको भावना अनुसार सरकार चल्नुपर्ने उनले बताए ।