काठमाडौं- उत्तर कोरियाले साइबर आक्रमण मार्फत १ अर्ब ६० करोड अमेरिक डलर बराबरको चोरी गरेको छ । संयुक्त राष्ट्रसंघको एक गोप्य दस्ताबेजमा उल्लेख भए अनुसार बैंक तथा मुद्रा सटही केन्द्रलाई निशाना बनाएर गरिएको आक्रमणबाट यो रकम चोरी भएको हो ।

चुहावट भएको संयुक्त राष्ट्रसंघको एक दस्ताबेजमा उत्तर कोरियाले आफ्नो परमाणु कार्यक्रमका लागि रकम जुटाउन साइबर आक्रमणको सहारा लिएको र त्यसबाट एक अर्ब ६० करोड अमेरिकी डलर बराबरको चोरी गरेको उल्लेख छ ।

गोप्य भनिएको सो प्रतिवेदनमा उत्तर कोरियाले रकम चोरीका लागि बैंक तथा मुद्रा सटही केन्द्रलाई निशाना बनाएर साइबर आक्रमण गरेको उल्लेख छ ।संयुक्त राष्ट्रसंघले हाल साइबर आक्रमणका ३५ घटनाको छानबिन गरिरहेको स्रोतले पुष्टि गरेको बीबीसीले जनाएको छ ।

संयुक्त राष्ट्रसंघीय सुरक्षा परिषद अन्तर्गत रहेको उत्तर कोरियामाथि प्रतिबन्ध निर्धारण गर्ने कमिटिमा पठाइएको प्रतिवेदनमा उत्तर कोरियालो साइबर–स्पेस मार्फत वित्तिय संस्थालाई लक्षित गरी आक्रमण गर्ने गरेको र त्यसबाट रकम जम्मा गर्ने गरेको उल्लेख छ ।

यस्तै विदेशी मुद्रा प्राप्त गर्नका लागि साइबर–मिनिङ्ग भएको सम्बन्धमा पनि विज्ञले अनुसन्धान गरिरहेका छन् । उत्तर कोरियालो क्रिप्टो करेन्सी एक्सचेन्ज सेन्टरमा पनि साइबर आक्रमण गर्दै आएको सो प्रतिवेदनमा उल्लेख छ ।