काठमाडौँ– सन् २००३ मा प्रदर्शनमा आएको फिल्म  ‘कोई मिल गया’ले दर्शकमाझ राम्रो छाप छोड्न सफल भयो । सो फिल्ममा ऋतिक रोशनको अभिनयको अहिले पनि तारिफ गरिन्छ ।

यस फिल्ममा वरिष्ठ नायिका रेखा, ऋतिककी आमाको भूमिकामा देखिएकी छिन् । यही फिल्मले उनीहरूको व्यक्तिगत सम्बन्ध अझ मजबुत बनेको ऋतिक बताउँछन् ।

भर्खरै पिंकभिलालाई दिएको अन्तर्वार्तामा सो फिल्मको सुटिङका दौरानमा घटेका रोचक घटना ऋतिकले बताएका छन् । सुटिङमा जाँदा गलत दृश्यको तयारी गरेर सेटमा हैरानी खेप्नु परेको किस्सा समेत सेयर गरेका छन् ।

आफूले तयारी गरेर दृश्य सुटिङ तालिकाभन्दा फरक परेको कुरा सुटिङ चालु हुनै लाग्दा थाहा पाएको ऋतिक सम्झन्छन् । उनी थप्छन्, ‘सुटिङ हुने बेला मलाई स्क्रिप्ट भनियो अनि गलत अभ्यास गरिएछ भन्ने महसुस भयो । मैले फ्ल्यासब्याकको तयारी गरेर आएको थिएँ ।’

रेखाले थप्पड हानिन्
फिल्ममा रेखा ऋतिकको आमा बनेकी थिइन् । फिल्ममा रेखाले ऋतिकको गालामा थप्पड हानेको राखिएको छ । जुन थप्पड ऋतिकले साँच्चिकै भेटेको बताएका छन् ।

ऋतिक भन्छन्, ‘सुटिङ गर्नुअघि रेखाले साँच्चै थप्पड हान्छु भन्नु भएको थियो र मैले वास्ता गरिनँ ।  तर सुटिङमा कडा थप्पड लाग्यो ।’

पिटाइ भेटेपछि रेखाले गालामा पिट्छु भनेको कुरा साँचो रहेछ भन्ने महसुस भएको ऋतिक बताउँछन् । तर साँच्चिकैको पिटाइ सो दृश्यलाई अझ मजबुत बनाएको ऋतिकको बुझाइ छ ।

कोई मिल गया’मा ऋतिक रोशन र रेखा बाहेक प्रिती जिन्टा र जोनी लिभरलगायतका कलाकारले काम गरेका थिए । यो फिल्मलाई ऋतिकका बुबा राकेश रोशनले निर्देशन गरेका थिए ।