काठमाडौँ– इंग्लिस प्रिमियर लिग फुटबलमा आर्सनल शीर्षस्थानमा उक्लिएको छ । गएराति भएको खेलमा ब्रेन्टफोर्डलाई २–१ गोलले हराउँदै आर्सनल शीर्षस्थानमा उक्लिएको हो ।

आर्सनलको जितमा डेक्लेन रिस र काइ हाभेर्टजले एक–एक गोल गरेका थिए । ब्रेन्टफोर्डका योअने विसाले एक गोल फर्काएका थिए ।

आर्सनलका डेक्लेनले खेलको १९औँ मिनेटमा सुरुवात गोल गरेका थिए । तर पहिलो हाफको इन्जुरी समयमा ब्रेन्टफोर्डका विसाले गोल गर्दै खेललाई १–१ गोलको बराबरीमा ल्याए ।

त्यसपछि खेलको ८६औँ मिनेटमा हाभेर्टजले गरेको गोलसँगै आर्सनल २–१ गोलले विजयी भयो ।

यो जितसँगै आर्सनल २८ खेलबाट ६४ अंक जोडेर तालिकाको शीर्ष स्थानमा उक्लिएको छ । एक खेल कम खेलेको लिभरपुलको ६३ र तेस्रो स्थानमा रहेको म्यानचेस्टर सिटीको ६२ अंक छ ।