काठमाडौं – चलचित्र ‘हजार जुनीसम्म’ प्रदर्शनमा आउन लागेको छ । यो फिल्म साउन ३० गतेबाट प्रदर्शनमा आउँदैछ । फिल्ममा आर्यन सिग्देल, स्वस्तिमा खड्का, प्रियंका कार्की, सञ्चिता लुइँटेल, अखिलेस प्रधान, सलोन बस्नेत लगायतका कलाकारले अभिनय गरेका छन् ।

मंगलबार राजधानीमा भेटिएकी स्वस्तिमाले आफ्नो भूमिकाबारे खुलाइन् । उनले यो फिल्ममा आफूले सिक्किमे युवतीको भूमिकामा अभिनय गरेको खुलासा गरिन् ।

‘दर्शकले यो फिल्ममा मेरो कस्तो भूमिका होला भनेर चासो दिइरहनुभएको छ, बुलबुलमा अभिनय गरेपछि धेरैको चासो पनि छ,’ स्वस्तिमाले भनिन्, ‘फिल्ममा मैले आधुनिक युवतीको भूमिका निभाएकी छु, धेरैले मलाई पहिलेका सिनेमाको जस्तो पनि मान्न सक्नुहुन्छ, तर भूमिका मन पराउनुहुनेछ ।’

फिल्मको ट्रेलरबाट स्वस्तिमाले राम्रो प्रतिक्रिया पाएकी छिन् । चलचित्र ‘बुलबुल’ मा दमदार अभिनय गरेका कारण पनि उनका फ्यान बढी आशावादी छन् ।