काठमाडौं– मुलुकका विभिन्न जिल्लामा पानीमा डुबेर चारजनाको मृत्यु भएको छ ।

सर्लाहीको बागमती नगरपालिका–४, नयाँ बस्तीस्थित गोडारी खोलामा नुहाउने क्रममा डुबेर स्थानीय गुणबहादुर चितौरे मगरकी ७ वर्षीया छोरी अस्मिताको मृत्यु भएको हो । मंगलबार बिहान नुहान खोलामा गएकी उनको गहिरो पानीमा डुब्दा मृत्यु भएको प्रहरीले जनाएको छ ।

यता, लमजुङको बेसिशहर नगरपालिका–३, भरेडाँडास्थित पानीको पोखरीमा स्थानीय १६ वर्षीय रुकेश विक मृत अवस्थामा फेला परेका छन् । मंगलबार दिउँसो मृत अवस्थामा उनको शव फेला परेको हो ।

यस्तै, झापा, बुद्धशान्ति गाउँपालिका–६ शान्तिनगरमा माछा पोखरीमा डुबेर मंगलबार दिउँसो एक बालिकाको मृत्यु भएको छ । स्थानीय खड्कबहादुर लिम्बुकी १४ महिनाकी छोरी साखिम लिम्बु खेल्ने क्रममा घर नजिकै रहेको माछा पोखरीमा डुबेकी हुन् । पोखरीमा डुबेर अचेत भएकी उनलाई उपचारका लागि अस्पताल लैजाँदै गर्दा बाटोमै मृत्यु भएको प्रहरी जनाएको छ ।

यसैगरी, दाङको घोराही उपमहानगरपालिका–३, रागोटारामा मसोट खोलाले बगाएर बेपत्ता ५९ वर्षीया गमला विकलाई मृत अवस्थामा फेला पारिएको छ । खोला तर्ने क्रममा पानीमा खसेर बेपत्ता भएकी उनको शव मंगलबार बिहान फेला परेको हो ।