काठमाडौं– सर्वोच्च अदालतले दूरसञ्चार सेवा प्रदायक कम्पनी एनसेल प्रालिको लाभकर विवादसम्बन्धी प्रकरणको अर्को मुद्दाको फैसला सुनाउने मिति सारेको छ ।

रिटको क्षेत्राधिकारअन्तर्गत दर्ता भएको रिटमा मंगलबार निर्णय सुनाउने मिति तोकिएकोमा पुनः सारिएको हो ।

यसअघि प्रधानन्यायाधीश चोलेन्द्र शम्शेर राणा नेतृत्वको बृहद पूर्ण इजलाशले टुंग्याइसकेको लाभकर सम्बन्धी विवादका सम्बन्धमा रिटको क्षेत्राधिकार प्रयोग गर्दै एनसेलले अर्को रिट दायर गरेको थियो ।

यसअघि सर्वोच्च अदालतले गरेको फैसलाअनुसार ठूला करदाता कार्यालयले तोकेको लाभकर छुट हुनुपर्ने दावी एनसेल प्रालिका तर्फबाट रमेश घिमिरेले गत वैशाख २५ गते सर्वोच्चमा रिद दायर गरेका थिए ।

एनसेलले दायर गरेको रिटमाथि सर्वोच्च अदालतका न्यायाधीशहरु तेजबहादुर केसी, पुरुषोत्तम भण्डारी, डम्बरबहादुर शाही, पुष्पलता माथेमा र डा मनोजकुमार शर्माको वृहत पूर्ण इजलाशमा सुनुवाई भइरहेको छ ।

न्यायाधीश केसी नेतृत्वको असार २२ गतेको वृहत पूर्ण इजलाशले मंगलबारका लागि निर्णय सुनाउने मिति (निसु) तोकेको थियो ।