काठमाडौं- परराष्ट्रमन्त्री नारायणप्रकाश (एनपी) साउद फिनल्याण्ड जाने भएका छन् । उनी यही फागुन २२ देखि २३ गतेसम्म फिनल्याण्डको राजधानी हेल्सिन्कीमा आयोजना हुने कार्यक्रममा सहभागी हुन त्यसतर्फ जाने भएका हुन् ।

संयुक्त राष्ट्रसंघीय अल्पविकसित राष्ट्रहरूको दोस्रो ‘फ्युचर फोरम’ मा सहभागी हुन उनी आज राति त्यसतर्फ प्रस्थान गर्न लागेका छन् ।

परराष्ट्रमन्त्रीले अल्पविकसित राष्ट्रहरूको विश्वव्यापी समन्वय समूहको अध्यक्षका रूपमा फागुन २२ गते मञ्चको प्रारम्भिक सत्रलाई सम्बोधन गर्ने कार्यक्रम छ ।

साथै उनले ‘संरचनागत रूपान्तरण तथा नवप्रवर्तनका लागि रणनीतिक तीव्रता’ विषयक मन्त्रीस्तरीय संवादमा भाग लिने कार्यक्रम रहेको परराष्ट्र मन्त्रालयले जनाएको छ ।

अल्पविकसित देशहरूको दिगो विकासका निम्ति प्रविधि, ‘डिजिटाइजेसन’ एवं नवप्रवर्तनका माध्यमबाट संरचनागत रूपान्तरणमा सघाउन अल्पविकसित राष्ट्र तथा भूपरिवेष्ठित एवं साना टापु राष्ट्रका लागि राष्ट्रसंघीय प्रतिनिधिको कार्यालय र फिनल्याण्ड सरकारले संयुक्त रूपमा उक्त बैठकको आयोजना गरेका हुन् ।

परराष्ट्रमन्त्रीले फिन्निस समकक्षी एलिना भोल्टोनेनसँग द्विपक्षीय भेटवार्ता गर्ने कार्यक्रम छ ।