काठमाडौँ– वरिष्ठ गायक तथा संगीतकार भक्तराज आचार्य सोमबार ८२ वर्षको उमेर यस धर्तीबाट बिदा भए । शरीरमा अक्सिजनको कमी भएपछि ललितपुरस्थित मेडिसिटी अस्पताल लैजाने क्रममा बाटोमै उनको निधन भयो ।

स्वरसम्राट नारयाणगोपलका समकालीन स्रष्टा आचार्यमाथि २०४६ साल मंसिरमा संघातिक हमला भएको थियो । त्यसपछि उनी सङ्गीतबाट टाढा रहे ।

२०५० सालमा जिब्रोको क्यान्सरका कारण संगीतबाट टाढा मात्रै होइन राम्रोसँग बोल्न पनि नसक्ने भए । त्यसयता उनले झोलिलो पदार्थको सहारामै जीवन काटे ।

आचार्यको औपचारिक गायकी यात्रा भने विसं २०३० सालबाट भएको पाइन्छ । ‘होसियार यस बखत समयको मुखलाई चिन’ बोलको गीत गाएर उनले ‘अधिराज्यव्यापी राष्ट्रिय गीत प्रतियोगिता’मा स्वर्ण पदक प्राप्त गरेका थिए ।

त्यसपछिको १६ वर्ष उनी सङ्गीतमा सक्रिय भएर लागे । यस दौरानमा उनले ४ सयभन्दा बढी गीतमा स्वर र संगीत दिए ।

आचार्यका कालजयी गीतहरू
आचार्य आफ्नो जीवनको पछिल्लो ३४ वर्ष संगीतबाट टाढा रहे तर उनका धेरै गीतहरू आज पनि युवा पुस्ताको मुखमा झुन्डिरहेका छन् । अर्थात् उनका कालजयी गीतको सूची लामो छ ।

उनका ‘मुटु जलिरहेछ, यो मन गलिरहेछ’, ‘हजार सपनाहरुको माया लागेर आउँछ’, ‘जहाँ छन् बुद्धका आँखा,’ ‘आँशुजस्तो हो जीवन’,  ‘जति चोट दिन्छौ देउ मायालु’, ‘जीवन भनुँ त घात छ’, ‘सबै बेहोसी नसा पिएर’, ‘हजार आँखा हेर्ने मेरी मयालु’, ‘भुल्नै सकिन त्यो क्षण मिलनको’, ‘कोही नगरोस् प्रेम अमर’लगायत लोकप्रिय रहेका छन् ।