काठमाडौं- राष्ट्रिय योजना आयोगका पूर्वउपाध्यक्ष डा. जगदीशचन्द्र पोखरेलले नेपालले बंगलादेशलाई विद्युत् बिक्री गर्ने प्रक्रिया अघि बढ्ने बताएका छन् ।

राजधानीको दरबारमार्गस्थित पेभेलियन हलमा आयोजित पूर्वाधार कूटनीति : सीमापार ऊर्जा व्यापार विषयक अन्तरक्रिया कार्यक्रमलाई सम्बोधन गर्दै पूर्वउपाध्यक्ष पोखरेलले विद्युत् बिक्रीको प्रक्रिया अघि बढ्ने बताएका हुन् । उनले बंगलादेशसँग विद्युत् व्यापारमा मूल्य निर्धारणको कुरो पनि चाँडै टुङ्गिने विश्वास व्यक्त गरे ।

कार्यक्रममा स्वतन्त्र ऊर्जा उत्पादक संघ नेपालका अध्यक्ष गणेश कार्कीले नेपालमा उत्पादित विद्युत् नेपालमै खपत गर्ने वातावरण बनाउनुपर्नेमा जोड दिए । त्यसपछि बल्ल बाँकी भएको विद्युत् अन्तर्राष्ट्रिय बजारमा बिक्री गर्नेबारे सोच्नुपर्ने उनको भनाइ छ । उनले नेपालको विद्युत् खरिद गर्न भारत र बंगलादेश तयार भएरमात्र नहुने भन्दै यसका लागि ट्रान्समिसन लाइनजस्ता पूर्वाधारको विस्तारमा जोड दिनुपर्ने बताए ।

कार्यक्रममा परराष्ट्र मामिलाका जानकार अरुणकुमार सुवेदीले नेपालको जनस्रोतका विषयमा राष्ट्रवादको अनावश्यक प्रभाव बढ्दा समस्या निम्तिएको बताए ।

इन्स्टिच्युट फर स्ट्राटेजिक एण्ड सोसियो इकोनोमिक रिसर्च आइएसएसआरले आयोजना गरेको कार्यक्रममा ऊर्जा मामिलाका जानकार, सरकारी निकायका प्रतिनिधिहरु, पत्रकार र आम सर्वसाधारणको उपस्थिती रहेको थियो ।