काठमाडौं- अर्थमन्त्री डा प्रकाशशरण महतले बैंक, वित्तीय संस्था तथा सहकारी संस्थामा देखिएको समस्या समाधान गर्न बैंकिङ कसुर तथा सजाय (दोश्रो संशोधन) विधेयक ल्याइएको बताएका छन् ।

आइतबार प्रतिनिधिसभा बैठकमा उक्त विधयेकमाथि विचार गरियोस् भन्ने प्रस्तावको छलफलका क्रममा आएका जिज्ञासाको जवाफ दिँदै मन्त्री महतले चेक अनादारमात्रै नभइ समग्र बैंकिङ क्षेत्रमा देखिएका समस्या समाधान गर्न संशोधित विधेयक ल्याइएको बताएका हुन् ।

उनले विधेयकमा बैकिङ्क कसुरको सजायलाई व्यवस्थीति र निरुत्साहित गर्ने व्यवस्था राखिएको जानकारी दिए । विद्युतीय आर्थिक अपराधलाई नियन्त्रण गर्न मन्त्रिपरिषदबाट अघि बढाएर बैंक तथा वित्तीय संस्था सम्बन्धी ऐन (बाफिया) ऐन संसदमा पेश गर्न लागिएको उनले बताए । यस विधेयकमा समेटिन नसकिएका विषयलाई बाफिया ऐनमा समावेश गरिने उनको भनाइ छ ।

बैठकले बैकिङ कसुर तथा सजाय (दोश्रो संशोधन) विधेयकमाथि विचार गरियोस् भन्ने प्रस्तावलाई सर्वसम्मत पारित गरेको छ ।